Tröötekonkoer krig nuuje opzèt

2020 6 Daagse

Vastelaovesmaondig is in Zitterd al bienao ein hauf eeuw de daag van de laevende meziek. Zaate hermeniekes laote deze daag hun muzikaal klanke klinke euver de doezende verkleide luuj die Vastelaovend viere in ’t Marotteriek. Op Vastelaovesmaondig 25 Fibberwari is ‘t Tröötekonkoer, mit eine nuuje opzèt, van 14.00 pés 20.00oere op de Zittesje mert.

Zaate Hermeniekes
Wo in de vruigere decennia gereigeld nuuj kapelle ontsjonge, motte v’r taegeweurdig constateiere dat – jaomergenog- om de zoväöl tied ein zaate hermenieke deit besjloet om neit mee op te traë of gans te sjtoppe. En nuuj kapelle komme d’r neit mee bie. Gelökkig zeen d’r nog altied versjèllende Zittesje zaate hermeniekes die ’t Tröötekonkoer kleur gaeve. Dat zeen Noots Biejein, Aafsjlaag Zitterd, TisNiksenTwurtNiks, ’t Hermenieke, Sjtadskapel ’t Trumke en ’t Tröötje, Hou op die Kis en es aafsjloeter Trööt in de Gööt. Daonaeve komme de letste jaore versjèllende kapelle oet anger plaatsje. Dit jaor zeen dat de Sjwaegele Band oet Lömmerich, BBC Eindhoven en es sjpisjaal gaste de kapel De Herriemenie van 11 oet Nijmegen. Daomit blieve de kapelle de kern van ’t Tröötekonkoer.

Artiste
Dit jaor wurt ’t grootste kapelletreffe van de regio oetgebreid mit DJ Sepp, dae de kapelle mit meziek aafwisseld en versjèllende artiste, namelik Henk Dols, Tam Tam en Don Kiesjot. Dit jaor regeiert eine bezunjer muzikale sjtadsprins euver ’t Marotteriek. Ziene Hoogheid Thierry I haet ein prachtig leidje cadeau gekrege van ziene naef en bèste vrunj Youri, getiteld ‘Eure Prins’. Dit leidje geit hae ouch op ’t vernuuje Tröötekonkoer zènge. Prinsevader René Dirkx zèngk de Marottesjlaager ‘Mènnigmaol roup ich Alaaf’.

Dees mix van Zittesje Kapelle, gaste, eine DJ en artiste zörg veur eine nuuje opzet. De väöle Vastelaovesvierders kènne op dees meneier geneite van ein väölziejige combinase.

Bron: De Marotte Zitterd
Foto: VastelaovendZitterd – RBZitterd
Illustrasie: Ontwerp: studio MarQ