Trök in de Tied: Zittesj Vastelaovesleidjes Konkoer

Jaorliks organezeiert Sjtadsvastelaovesvereiniging De Marotte Zitterd mit Sint Rosa ’t Zittesj Vastelaovesleidjes Konkoer (ZVK), wobie de Zittesje sjlaajer veur ’t nuuje sezoen wurt gekaoze. In vruiger jaore vonj de verkeizing plaatsj op Sint Rosa-Daensdig in zaal Laumen oppe Pötsjtraot en woort de nuuje sjlaager gakaoze door ein vakzjurie en aafgevaardigde van vereiniginge en buurte. Enj van de jaore ‘90 kreeg ‘t ZVK eine vernuujde opzàt, wobiej de leidjes laif woorte gezonge door versjèllende Zittesje zèngesj en begeleid door ein laif orkes. Taeves woort ’t ZVK verplaatsj nao Sint Rosa Zaoterdig op lokases es de Sjouwburg, Poppodium Volt en de Sjpeigeltent op ’t Sint Rosafestival. Saer 1999 wurt aan de winnaar de Thei Hunnekens Wisseltrofee oetgereik. Dees trofee is vernuimp nao de väöl te vruig euverleje Thei Hunnekens, dae bekend sjteit es de grondjlègger en jaorelangk drievende krach achter ’t oetbrènge van Zittesje Vastelaovesleidjes op LP’s en CD’s.

Coronacrisis
Dit jaor zaw ’t ZVK plaatsj vènje op Sint Rosa-zaoterdig 28 Augustus. Aevel door de maatreigele rondjom op Coronavirus en de grote onzekerhede veur de kommende tied höbbe De Marotte Zitterd, mit pein in ’t Vastelaoveshart, besjlaote dat dit jaor gein leidjeskonkoer zal plaatsj vènje. Es de Corona-maatreigele ’t toelaote zal bekeke waere of ’t ZVK op ein later tiedsjtip esnog gehawte kènt waere.

Trök in de Tied
Trök in de Tied nao Sint Rosa-Zaoterdig 2001. In eine werme Glazezaal (foyer) van de Sjouwburg vonj op dae aovend ’t Zittesj Vastelaovesleidjes Konkoer plaats en woort de Zittesje sjlaager veur ’t Vastelaovessezoen 2002 gekaoze. De 11 leidjes die in de finale sjtonge woorte laif gezonge door versjèllende Zittesje zèngesj en laif begeleid door ’t Sint Rosa-Orkes o.l.v. Jan van Daal.
Nao ’t telle van de sjtömme van de vaksjurie, de aafgevaardigde van buurte en vereiniginge en ein gedeilte van de euverige aanwezige woort pès Vastelaovessjlaager 2002 gekaoze  ‘Vastelaovend in oos sjtad’, gesjreve door Phil Schaeken mit zangk van Ron Hunnekens.

In dae tied waar nog gein Marotte TV en zellefs YouTube besjtong nog neit. Opnames van ’t ZVK2002 zeen in dae tied gemaak door Omroep Start TV en op TV oetgezonje. Dees beelde (van eine auwe videobandj) zeen hiej onger te bekieke.

Zittesj Vastelaovesleidjes Konkoer 2002 (komplete oetzending)
Zittesj Vastelaovesleidjes Konkoer 2002 (Samevatting)

Beelden opgenomme en oetgezonje door Omroep Start TV.