’t Kanon van ’t Balkon mit Limburgse topartiste

2020 6 Daagse

Vastelaoveszaoterdig 22 Fibberwari organezeiert Societé Zitterd de 17de edisie van ‘t Kanon van ‘t Balkon es äöpener van de Zittesje Vastelaovend. Tössje 16.11 en 0.33oer is ein gevarieiert pregram mit optraës van väöle topartieste oet gans Limburg. Sjtadskapel ’t Trumke en ’t Tröötje is in 2004 gesjtart mit de organezase van dit evenemént en höbbe dit jaor de organezase euvergedrage aan ein kemissie die vélt onger Societé Zitterd (ein samewirking tössje Senaat, Auw Prinse en Optoch Kommitee Zitterd).

Al jaore geneite Vastelaovesvierders uit de ganse provincie en de euregio van de unieke sfeer, dae eigelik bienao neit is te besjrieve. Tösje de luuj belaefste Vastelaovend in zien puurste vorm! Dit kump mede door de väöle sjpisjaal leicheffekte, konfettikanonne, de verlichte historische gevels van de mert en de donkere hemel. De väöle verrassjinge sjaon garant veur ein unieke belaevenis van d’n eeuwe auwe Zittesje Vastelaovend!

De Zittesje Kènjerkapel

‘t Pregram sjtart om 16.11oere mit ’t Kénjerkanon, sjpisjaal veur en door de kènjer. Hiej zulle optraë o.a. versjèllende Zittesje basissjoole, de Zittesje Kènjerkapel en de top 3 van ‘t Kinjer Vastelaovend Leedjesfestival 2020 mit wènneres Pieke Linssen, nómmer 2 De Spektakelieërs oet Bieëgdje en de nómmer 3 Louke & Puk. ’t Kènjerkanon wurt aafgesjlaote door finaliste van ’t Tiener Vastelavesleedjes Konkour mit o.a. Veier-G en de top 3 van ’t TVK 2020: wènneres Isabelle Jennes, nómmer 2 Cheyenne en nómmer 3 Puur Plat.

Aansjloetend aan ’t Kènjerkanon sjtart de ruum 6 oer doerende artiesteparade van ‘t Kanon van ’t Balkon mit väöle topartiste oet gans Limburg. De prizzentase is dit in henj van de nuuj prizzentatore Maurice Indemans en Fieny Cals.

Wènnesj LVK2020: Spik & Span

Mér leifs 6 finaliste van ’t LVK 2020 sjtaon op ’t pregram mit daobiej de top3 mit de wènnesj van ’t LVK 2020 Spik & Span, nómmer 2 Bjorn & Mieke en de nómmer 3 Hoondervel (wénnesj LVK 2019) en wiejer de finaliste La Bamba, Andy en Roy en de Zittesje finalis Jesse & Jesse.

Naeve de LVK finaliste zeen d’r optraës van o.a. de grop Don Kiesjot, Erwin, Marvin Rosier, Guido Frissen (van de Schintaler) en wènnende sjlaagesj van Zitterd en omgaeving. Veur de richtig Zittesje vastelaovesklanke zörge o.a. Cyrille Niël, Koeraasj, Gein Haor Baeter, Sjtadskapel ’t Trumke en ’t Tröötje en Sjtóm Toeval mit sjtadsprins Thierry I. ’t Kanon van ’t balkon wurt aafgesjlaote door ein konzèr van Trööt in de Gööt, gevolg door de Limburgse nachtegaal Beppie Kraft.

Om 23.11 oer wurt mit väöl sjpektakel de Vastelaovend offesjeel geäöpent en zal Burgemeister van Zitterd-Gelaen Sjraar Cox de sjleutel van de sjtad zal euverdrage aan Sjtadsprins Thierry I. Bezunjer is dat dit voor burgemeister Sjraar Cox, dae aafsjeid geit numme, de allerletste sjeuteleuverdrach zal zeen.

Veur ‘t Kanon van ’t Balkon zal de mert waere ingerich es festival terrein. Dit beteikend dat de Mert allein is bereikbaar via de Paesjsjtraot en de Lömmerichersjtraot (bie de Sjtadspomp). De reigel is Vol=Vol. Op ’t moment dat ’t maximaal aantal bezuikesj op de Mert bereik is zal de mert waere aafgesjlaote. In verbandj mit de veiligheid is ‘t neit toegesjtaon om karre en eige drank of aete mit te numme! Bie de entree’s zal dit waere gecontroleiert. Let Op: Konsumpsies zeen allein verkrieg mit de ‘Sjpaspas’ van Stichting Horeca Mert Zitterd.

Foto’s: Arjan Krijntjes (1+3) / Ton Dirkx, Sittard (2+4)