Zo wie bekènd haet Sjtadsprins Thierry I eine grote passie veur zènge. Zelfs tössje zien väöle Prinselikke take door sjteit hae same mit Maxime Tummers es ’t duo Sjtóm Toeval op de Limburgse podia. Daonaeve is Thierry ouch aktief es solo zenger en haet hae al versjèllende singles oetgebrach.
Sjpisjaal veur zien prinssjap haet Thierry ’t leidje ‘Eure Prins’ opgenomme, dat gans geit gans euver ziene druim om Sjtadsprins te waere. ’t Leidje is ein cadeau van ziene naef en bèste vrundj Joeri Kalkhoven. Joeri haet altied al ein nummer veur Thierry wille produceiere en vonj ’t Prinssjap van Thierry noe ‘t ideale moment daoveur. Saer Thierry vertelde dat hae Sjtadsprins ging waere haet Joeri bienao daag en nach gewirk om dit leidje te realizeiere. De teks en meziek zeen gesjreve door Bart Storcken mit ein arrangzjement van Dave Vreuls.
De primeur van ’t door Sjtadsprins Thierry gezonge leidje waar op de Seniorezitting in de sjtadssjouwburg. ’t Leidje is digitaal verkriegbaar via de streamingsdeinste van o.a. iTunes en Spotify.
Van ’t leidje is ongersjtaonde videoclip gemaak dae ouch te bekieke is op ’t YouTube kanaal van Thierry Dirkx.
De teks van ‘Eure Prins’:
Es kleine man mit pap en mam keek ich oet nao de prins
Wo blif dae man en gooit hae dan get lekkesj wat se aete kèns
En boh wat zou dat sjiek zeen ooit die vare op mien patsj
Zelf appelsiene sjmiete ouch al wurt d’r ein gepratsj
En hie sjtaon ich dan eure prins, ouch mer ’n minsj van vleisj en bloud,
Laot gaon en lach en leef en zéng, vastelaovend ’t geit os goud.
Laot ós same raoze, heerlik hel op träöte blaoze
Appelesiene sjmiete, optoch kieke, same make veer ’t gaaf
Laot ós same danse, lekker drènke, pak dien kanse
Laot ’t kanon van ’t balkon mer knalle, Zitterd Zitterd Alaaf
Alaaf Alaaf Alaaf
Lekker lache, laeve, same belaeve
Nooitsj gedach dat ich gevraog zou waere: ‘’Wurs doe ónze prins?”
In ’t blauw veurop gaon dat is miene vastelaoveswunsj
’T pekske aangemaete en nuuj vaere op mien patsj
En mer zjwiege euver dat ich ’t zou waere mit sjmoesjes en angere kwatsj
En hie sjtaon ich dan eure prins, ouch mer ’n minsj van vleisj en bloud,
Laot gaon en lach en leef en zéng, vastelaovend ’t geit os goud.
En es ’t dan esjelegounsdig is en alles is veurbie
Houp ich dat se dènks wat jaomer, mer ouch wat fejn ich waor d’r bie
Video en songtekst: YouTube kanaal Thierry Dirkx
