Sjleuteleuverdrach

2020

Zaoterdigaovend 22 Fibberwari zal burgemeister Sjraar Cox van Zitterd-Gelaen de sjleutel van de sjtad euverdrage aan Sjtadsprins Thierry van Sjtadsvastelaovesvereiniging De Marotte Zitterd. Dit plechtig moment zal plaatsj vènje om 23.11oere tiejes ’t Kanon van ’t Balkon.

De klok die aan ’t balkon van kafee De Kroon aan de mert hingk tèlt aaf richting Vastelaoveszaoterdig ellef menuut euver ellef saoves. Op dat tiedsjtip zal Sjtadsprins Thierry I ’t offesjeel sjtartsjot veur Vastelaovend 2020 gaeve. Op ‘t moment dat burgemeister Sjraar Cox op ’t balkon kump, sjtarte de doezende Vastelaovesvierders op de mert mit ’t aaftelle van 11 pès 0. Nao ’t aaftelle zal de burgervader names ’t College van B&W de sjleutel van de sjtad euverdrage aan de Sjtadsprins. Omdat Sjtadsprins Thierry I de letste is van alle Prinse en Prinsesse die eine sjleutel veur ein sjtadsdeil höbbe gekrege, waere vanaaf dat moment alle belangrieke besjloete genomme door de Prinse. Bezunjer daobie is dat dit taeves de allerletste sjleuteleuverdrach is veur burgemeister Cox. Medio Meert zal hae aafsjied numme es burgemeister en wurt ziene opvolger geinsjtalleiert. Dees sjleuteleuverdrach is dus ein historische gebeurtenis.

Bron: De Marotte Zitterd
Foto: via De Marotte Zitterd