Gounsdig 5 Fibberwarie om 14.00oere is in de groote zaal van de Zittesje Sjtadssjouwburg ‘De Domijnen’ veur de 11de keer de Seniorezitting. Dees zitting wurt georganizeiert door Sjtadsvastelaovesvereiniging De Marotte Zitterd in samewirking mit de Zonnebloem. Vanaaf 13.00oer is de zaal geäöpent en waere de bezuikesj perseunlik ontvange door Sjtadsprins Thierry I, Vorst Marot Jan I en de regionale veurzitter van de Zonnebloem, Tom Weyenberg. De prizzentase van de zitting is in henj van, de nuuje Ridder in de Orde van de Pappegey, Jacques Pfenning.
De seniorezitting sjteit garant veur eine gezellige middig vol kolder en meziek van ein keur aan Zittesje en Limburgse artiste. Zo zal meervoudig Limburgs Buutekampioen Ger Frenken ein van zien buute brènge en zal de Limburgse nachtegaal Beppie Kraft de zaal in sjoenkelsjtömming brènge mit de vertolking van ein aantal van häör bekende leidjes. Wiejer zulle deze middig optraë leerlingen van de Kindcentrum Sittard, TVK finaliste en zèngeres van ’t Marotte Tienerleidje Cheyenne, Prinsevader René Dirkx mit de Zittesje sjlaager ‘Mènnigmaol roup ich alaaf’ en Koeraasj. Christel en Quinn (bekend van W-Dreej) en de grop Don Kiesjot sjtaon garant veur ’t mitzènge van hun bekende Limburgse leidjes. De muzikaal omliesting is in henj van de Marottekapel.
Nao aafloup van de ziting trakteiert de Nonnevotteklup alle aanwezige op ein lekkere nonnevot. De zitting is veur jeederein toegankelik. Entreekaarte koste 15 Euro (incl. ein drénkske in de pauze) en zeen verkiegbaar aan de oetbalie van de Sjtadssjouwburg of bie de Marottewinkel (’t Kallebeske, Sjteivig 33 in Zitterd). Taeves is ’t muigelik om kaarte te rizzerveiere via email: seniorenzitting@gmail.com
Bron: De Zonnebloem,regio Sittard-Geleen
Foto: Ton Dirkx
