Orde van Verdeinste van SLV veur Peter Schillings

Tiejes ’t gezellige Finale Sjpektakel van Sjtadsvastelaovesvereiniging De Marotte Zitterd kwaam ouch ’t besjtuur van de SLV, de Samewirkende Limburgse Vastelaovesvereiniginge, de bondj van de zeventeen grootste Vastelaovesvereiniginge van Limburg op ‘t podium. De dillegase besjtong oet president Raymond Vlecken, Paul Göttgens, Frits Dirks en Max Ruiters. De president melje dat ’t besjtuur van de SLV haw besjlaote om Peter Schillings mit de Orde van Verdeinste te ongersjeije.

Peter is saer 4 Jannewari 2003 lid van de Wieze Raod van De Marotte. Zien belangriekste taak is dae van Sjatmeister. In ’t sezoen 2013-2014 waar hae lid van de sjtuurgrop 12×11 jaor De Marotte. Peter haet de finansjeel adminestrase nao ein profesjoneel nivo gebrach, wodoor mede dankzie ziene inzèt De Marotte ein mee dan gezonj vereiniging is. Taeves is hae mede-initiator, penningmeister en sjponsorwerver van de Societé de Marotte, ’t businessnetwerk veur ’t bedriefslaeve mit hart veur de Zittesje Vastelaovend.

De organezasesjtructuur bènne de Marotte is in de loup van de jaore nogal ingriepend aangepas. Passend bènne de eise die de tied sjtèlt en de ambisie die De Marotte höbbe. In de loup van de tied haet Peter es besjtuurslid väöle biedrages geleverd aan zake die höbbe geleid pés mutasies in de organezasesjtructuur, nuuj kemissies, take/bevougdhede, verbreijing, draagvlak etc. Onger Vors Marot Ben I betrof dit veural de verjonging en vernuujing van de Wieze Raod, onger Vors Marot Harie I betrof ’t intensiveiering samewirking mit anger vereiniginge en de nuuje besjtuurssjtructuur.

Wiejer is Peter penningmeister van de Stichting Carnaval Binnenstad Sittard, saer 1982 onaafgebraoke deilnummer aan de groote optoch, lid van Vastelaovesklup ‘de Klaatsjes’ en eine grote Kölle-fan. Daonaeve is hae trainer/coach van ’t tweede sofbalteam van de Cheetahs in Baek en waar hae es penningmeister actief veur ’t kirkbesjtuur van Broukzittert, Jongerengrop Sound ’70 en de Vocal Group S(w)inging voices.

De laureaat moch oet henj van de president van de SLV ein oorkonde mit de waopes van de plaatsje van de lidvereiniginge in ontvangs numme.

Bron: De Marotte Zitterd
Foto: Ton Dirkx, Sittard