Jaorliks wurt door de lede van ’t Optoch Kommitee Zitterd same mit hun partners en ein aantal vriewilligesj eine nuuje Prinsewaage geboewd veur de Zittesje Sjtadsprins. De prinsewaage wurt, in plaatsj van ‘t gebroekelike papier, mit ein sjpisjaal techniek bekleid mit jutesjtof. Waages die mit jutesjtof zeen bekleid zeen väöl sjteviger en kènne taege waer en wèndj. Rae om de prinsewaages van jutesjtof te make is dat dees waages zo langer mitgaon en nao de Zittesje optoch nog versjèllende jaore kènne waere verhuurt nao anger plaatsje in Limburg en Belsj.
In Mesjtreich boewe de Tempeleers èns per decennuim eine nuuje Prinsewaage. Veur de boew van de nuuje prinsewaage höbbe de Tempeleers de hulp gezoch bie ’t Optoch Kommitee Zitterd om deze nuuje waage te boewe mit jutesjtof. ’t Optoch Kommitee haet de Tempeleers geholpe in de planning, organezase en oetvuiering. Daonaeve haet ’t OKZ ’t materiaal en ’t ongersjtél bezörg, woort eine workshop gegaeve en is ouch nog ter plaatsje geholpe mit sjteun van de waageboewesj John Smeets (De Sjnaake) en Maikel Schut (Riekwaeg Zuid).
Es dank veur de hulp zeen de lede van ’t Optoch Kommitee, mit partners en de waageboewesj door de Tempeleers oetgeneudig veur ein bezuik aan Mesjtreich. In café ’t Pruuske zeen alle betrokkene ontvange door de Tempeleers en Sjtadsprins Luc II van ‘Groet Mestreech’. Oet dankbaarheid zeen zie ongersjeije mit de jaormedaajes van de Tempeleers. ’t Optoch Kommitee op häör beurt haet Sjtadsprins Luc II gedecoreierd mit de medaaje van de Perpluu (Optoch Kommitee Zitterd, Senaat en Auw Prinse).
Bron: Optoch Kommitee Zitterd
Foto: Optoch Kommitee Zitterd
