De Zittesje optochzjurie en Veldeke Zitterd gaon samewirke om ’t gebroek van ’t Zittesj dialek in de optochte te sjtimuleiere. Same höbbe zie de ‘Richtig Zittesj Pries’ in ’t laeve geroupe veur ’t authentiek Zittesj dialek onger de deilnummesj.
Veldeke Zitterd zal eine aafgevaardigde levere bènne de Optochzjurie en zal daobie sjpisjaal lètte of de deilnummesj ’t richtig Zittesj dialek machtig zeen. Daobie zal veural waere gekeke welke deilnummer ‘de meis richtig Zittesje titel’ veur ’t thema haet gekaoze en dat thema ouch mit richtig Zittesj sjpel deit oetbeelde. De deilnummer dae dat volges de aafgevaardigde van Veldeke ’t bèste deit wènt de ‘Richtig Zittesj Pries 2020’.
“Vastelaovend is eine belangrieke drager van ’t Zittesj dialek”
Patrick Werdens van Veldeke Zitterd: “Vastelaovend is eine belangrieke drager van ’t Zittesj dialek. Veer gaeve gaer ein bliek van oos waardeiering aan al die optochdeilnummesj die de muijte numme ’t Zittesj dialek laevend te hawte.”
Astrid Verblakt, veurzitter van de Optochzjurie Zitterd: “Veer drage gaer bie aan ’t sjtimuleiere van ’t Zittesj dialek in de optoch, omdat ’t dialek onlosmakelik verbónje is mit de Zittesje Vastelaovend.”
Foto: VastelaovendZitterd – RBZitterd
