Op vriedig 31 Jannewari is de beurt aan de jeugdige Marotte en Marottinekes van 11 pés 14 jaor om te geneite van eine sjieke aovend tiejes ’t altied gezèllige jeugdevenement van Sjtadsvastelaovesvereiniging De Marotte Zitterd. Vanaaf 19.11oere äöpene de deure van Kafee Bloem op de Zittesje Mert. Mit “Gank mit, mit oze Vastelaovesrakèt” es motto, belaof ’t eine gezèllige aovend te waere. De eindtied van de aovend is 22.30oere.
De jeugd is de toekòms en mit deze aovend, sjpisjaal veur hun georganezeiert, kènne zie mit hartelust geneite van d’n eeuwen-awwe Zittesje Vastelaovend. Dat zal ongetwiefelt lökke mit sjwingende optraës van o.a. Cheyenne (2e plaatsj TVK 2020), Shakin DJ’s en DJ Wouter.
Tiejes de aovend zeen versjèllende leuke aktiviteite, wo gesjmink waere d’r eine van is. En dan is d’r ouch nog veur jeederein ein traktase! De verkeizing van de sjoonst verkleide Mechelke en Sjnaak zal ouch dit jaor neit ontbraeke. Dus… doch dien bès en trèk ’t sjoonste pekske aan om kans te make op dae felbegeierde pries. Sjtadsprins Thierry I zal aanwezig zeen om d’r same mit de jeugd eine onvergaetelikke aovend van te make.
’t Marotte Jeugdevenement is ein besjlaote evenement. Allein jongere mit ein geljig entreebewies waere bènnegelaote. Wiejer zeen vriewilligesj van De Marotte aanwezig om de aovend te begeleije én om ein uigske in ’t zeil te hawte. Auwesj zeen vanaaf 21.00oere van harte wilkom om ein kiekske te kómme numme. Entreebendjes zeen gratis verkriegbaar via de basissjoole en in de Marottewinkel (’t Kallebeske, Sjteivig 33).
Bron: De Marotte Zitterd
Foto: De Marotte Zitterd
