Marotte Finale Sjpektakel weier gesjlaag!

2020

Zaoterdigaovend 15 Fibberwari waar in eine volle podiumzaal van de sjouwburg ‘t gezellige en zeer sfeervolle Marotte Finale Sjpektakel.

De aovend woort aafgetrap door zènger Coen Janssen dae de zaal al goud opwermde en Limburgs Buutekampioen Bas van Neer dae mit de buut ‘Werk höbbe is niks…’ veur de neudige lach zörgde. Katja Henze, ein muzikale collega en gouw vrundjin van Sjtadsprins Thierry I, brach de zaal in sjoenkelsjtömming. Buuttereedner Jan Geraets leet in de rol van daakdekker zeen woveur hae meervoudig Limburgs Buuttekampioen is, wènt mènnig toesj en sjaterlach klonk door de zaal.

De finale van de zitting woort ingezàt door de grop Kölsch Platt mit bekende Kölsche leidjes en zenger Björn van Berkel oet Grubbevors. De aafsjloeter van de aovend waar Beppie Kraft die mit häör bekende leidjes, die door de ganse zaal woorte mitgezonge, veur eine super sjtömming in de zaal zörgde. ’t Waar dan ouch neit verwonjerlik dat aan ’t ènj van häör optraë nog mènnigmaol ‘Zugabe’ klonk.

Naeve de muzikaal optraës ware deze aovend twee offesjeel momente. Aan ’t begin van de aovend woort Peter Schillings door ’t besjtuur van de SLV ongersjeije mit de Orde van verdeinste veur zien inzèt veur De Marotte en de Vastelaovend. Later op de aovend woort Wim Clerkx door De Marotte benuimp pès Ere-Lid van De Marotte.

De aovend woort aafgesjlaote door prinsevader René Dirkx, dae laif begeleid door de Marottekapel, de sjlaager ‘Mènnigmaol roup ich alaaf’ zong en Sjtadsprins Thierry I mit zien eige prinseleidje ‘Eure Prins’.

In ’t aafsjloetende dankwoord keek Vors Marot Jan I alvas veuroet nao 2021. Wènt dan sjtaon väöl vernuujinge op ’t pregram bie De Marotte. Zo zal al op 2 Jannewari 2021 ein grote nuujjaors-party zeen mit de oetruiping van de Sjtadsprins 2021.

Mèr noe eesj richting de Vastelaovesdaag van Vastelaovend 2020. Eine Vastelaovend dao door sjtorm ‘Dennis’ op zondig 8 Meert nog ein extra Vastelaovestoetje krig mit de oetgesjtèlde kènjeroptoch.

Foto en video: VastelaovendZitterd – RBZitterd