Tiejes de oetruipingsaovend is dhr. Manfred Stielow oet Kölle door Sjtadsvastelaovesvereinging De Marotte Zitterd benuimp pes Ridder in de Orde van de Pappegey. Dees ongersjeijing wurt oetgereik aan eine persoon dae väöl veur de Zittesje (Vastelaoves-)cultuur beteikend. Manfred is de 148e Ridder dae saer 1989 is benuimp.
3×11 jaor
Op 9 November bezoch ein delegase van De Marotte Kölle om tiejes de sezoensäöpening van de Grosse Kölner ’t Tillegram van de Pappege veur te laeze. Hie in sjtong de benuiming van Manfred Stielow pés Ridder. Taeves woort hae geneut om op 4 Jannewari tiejes de oetruipingszitting in ’t Marotteriek prezènt te zeen om de benuiming offesjeel te make
Manfred is saer 1983 lid van de Grosse Kölner. Ein jaor later woort hae benuimp pes senator en weier twee jaor later woort hae benuimp pes lid van ’t besjtuur van de Grosse Kölner. Vanaaf 1997 waar hae sikretaris, ein funksie die hae vervulde pés aan zien aafsjeid. In totaal is de laureaat mér leifs 3×11 jaor aktief gewaes in ’t besjuur van de Grosse Kölner. Daoveur is hae versjellende maole ongersjeije, namelik mit Verdeinstorden des Festkomitee Kölner Karneval in Gold, Ehrenurkunde 33 Jahre Senator der Grosse Kölner en Ehrenratsherren der Grosse Kölner.
Manfred haet jaorelangk vanoet Kölle de kontakte ongerhawte mit De Marotte en de Marotte Senaat en haet daodoor ein belangrieke biedrage gehad in de bezunjere vrundjsjap tössje de twee vereiniginge. Dees vrundjsjap, die volges de archieve al in 1927 besjtong, besjteit al mee es 92 jaor. In al die jaore zeen euver en weer versjellende ongersjeijinge oetgereik. Manfred Stielow is de 7e Ridder dae in Kölle benuimp is. Ouch zeen in ’t verleje twee maol de zelfs in Zitterd zeldzame orde “Kommandeur in de Orde van de Pappegey” oetgereik.
Bron: De Marotte Zitterd
Foto: De Marotte Zitterd / Marotte TV
