LVK wènnesj Spik & Span op ’t Kanon van ’t Balkon

2020

Vastelaoveszaoterdig, 22 Fibberwari, is de 17e edisie van ’t Kanon van ’t Balkon op de Zittesje Mert. De organezase van ’t Kanon van ’t Balkon is vanaaf dit jaor in henj van ein kemissie die vèlt onger ‘Societé Zitterd’, ein samewirking tössje de Auw Prinse, Senaat en Optoch Kommitee Zitterd. Zie höbbe de organezase euvergenomme van Sjtadskapel ’t Trumke en ’t tröötje die in 2004 mit dit evenement zeen gesjtart. ‘t kanon van ’t Balkon is in die jaore gegruijt van ein kleinsjalig evenement tot ein fees op eine bomvolle mert dat neit mee weg te dènke is oet de Zittesje Vastelaovend

’t Kanon van ’t Balkon belaof ouch dit jaor weier ein groot Vastelaovesfees te waere. De nuuj organezase belaof dit jaor nog mee sjpektakel. Bie de artiste die zulle optraë zit de Top3 van ‘t LVK mit de wènnesj van ’t LVK 2020 Spik & Span, de nómmer 2: Bjorn & Mieke en de nómmer 3: Hoondervel (wènnesj LVK 2019). Alle drie sjtaon zie garant veur mitzènge, sjprènge en ein daverende sjtömming. Naeve de top 3 sjtaon mit La Bamba (wènnesj LVK 2013), Andy & Roy en Jesse & Jesse oet Zitterd nog èns drie finaliste van ’t LVK 2020 op ‘t pregram.

Wiejer zulle optraë o.a. Erwin, Marvin Rosier, Cyrille Niël, Koeraasj, Sjtadskapel ‘t Trumke en Tröötje en Trööt in de Gööt. Om 23.11oere zal burgemeister Sjraar Cox de sjleutel van de sjtad euverdrage aan de Sjtadsprins Thierry I. Veur de aafsjiednummende burgemeister zal dit de letste sjleuteleuverdrach zeen.
De kommende daag zal de organezase nog mee artiste bekend make die dees edisie zulle optraë.

Wie gebroekelik is veuraafgaond aan ‘t ‘grote’ Kanon van ’t Balkon, ’t Kenjer Kanon van ’t Balkon mit optraës van en door de kènjer en jeugd.

Bron: Kanon van ‘t Balkon
Foto: Stichting LVK