De Kènjeroptoch dae zondig 16 Fibberwari door de Zittesje bènnesjtad zaw trèkke geit NEIT door. De organezeierende Sjtichting Optoch Kommitee Zitterd haet dit zaoterdigmiddig besjlaote in nauw overlègk mit burgemeister Sjraar Cox van de gemeinte Zitterd-Gelaen en op advies van ’t team openbare orde en veiligheid.
Veur de ganse zondig wurt door de versjèllende benne- en boetelandse meteorologisch bureaus zeer ontsjtuiming waer veursjpeld mit helle wèndj van wèndjkrach 6 en op grote sjaol zjwaor wèndjsjtote mit oetsjeitesj pés 80km (wèndjkrach 9). Dees waersomsjendighede zörge veur de basissjoolkènjer, anger (jong) deilnummesj en ’t pebliek veur, tiejes en nao de optoch muigelik veur onveilige situases.
Vanaaf wèndjkrach 6 raoje veiligheidsdeinste boeteaktiviteite sjterk aaf. Dit advies höbbe ’t Optoch Kommitee en burgemeister Cox sjterk laote mitwaege in ’t besjloet. Dit ondanks de verwachte hoge temperatuur.
In ’t veurtrajek haet de organezase anger opties om de kènjeroptoch esnog te laote trèkke bekeke, echter zonder rizzeltaat.
’t Optoch Kommitee Zitterd haet in euverlegk mit de gemeinte Zitterd-Gelaen besjlaote om te kènjeroptoch te verplaatsje nao zondig 8 Meert 2020. Om de kènjeroptoch mit de Vastelaovesdaag te laote trèkke waar volges ’t Optoch Kommitee neit muigelik en neit gewunsj, omdat mit de Vastelaovesdaag anger aktiviteite zeen in Zitterd en de omringende wieke. Omdat tradisjoneel väöle sjoole in de Kènjeroptoch mittrekke is ouch bewus gekaoze veur eine datum dae vèlt nao de sjoolvekans.
