Insjtelase Thierry Dirkx pès 89e Sjtadsprins

Zaoterdig 18 Jannewarie e.k. vèngk om 20.00 oer in de podiumzaal van Sjtadssjouwburg ‘De Domijnen’ de insjtelasezitting van Sjtadsvastelaovesvereiniging De Marotte Zitterd plaatsj. De zaal is vanaaf 19.33 oer geäöpent. De muzikaal omliesting is in henj van de Marottekapel. Nao aafloup van de zitting is ´t Prinsebal mit DJ Sepp.

De insjtelasezitting van De Marotte is ein zitting die in ‘t teike sjteit van komme en gaon, mer dan in omgedreejde volgorde. ’t Eesjte gedeilte van de zitting sjteit in ’t teike van ’t aafsjeid van regeierend Sjtadsprins Rob I. Es eesjte véngk ‘t ‘plökke’ plaatsj. Volges protocol levert hae achtereinvolges de scepter, de vaere, de prinsemutsj, de ketting mit de nonnevot en ’t verke, ’t sjlaateveugelke en ‘t pappegeyke in. Daonao volg ´t dankwoord van de dan ex-Sjtadsprins. Rob en zien femieje kènne trökkieke op ein sjoon regeierperiode, wo in de leifde veur Zittesje meziek van Rob centraal sjtong. Taeves make zien vrunj van C.V. Ein Bietje Wiejer hun opwachting.

Tiejes de zitting kènne de aanwezige geneite van ein aantal muzikaal optraës van o.a. Guido Frissen (van de Schintaler), Sjtóm Toeval, Michèle Tummers, Tam Tam en Prinsevader René Dirkx. Taeves is tiejes de zitting nog ein verrassjend momènt. Weite wat dat is? Zörg dan tiejig veur kaarte!

Proklemase
In ’t tweede gedeilte van de zitting sjteit Thierry Dirkx centraal. De aankommende Marotteprins kènt raeke op de mitwirking van vrunj, femieje, buurt en bekende. Zie prizzenteiere gezamelik ein kolderieke ekt die bol sjteit van illemente die verwieze nao de nuuje Sjtadsprins en aktualiteit. Thierry, de 26 jaorige Pabo-sjtudent oet Obbeeg, is bie väöle bekend es zenger. Zowaal solo es es de helf van ’t duo Sjtóm Toeval. Thierry verzamelt beierglaazer en lego en is gans gek van Harry Potter. Kortom ingrediënte genog veur ein leuke akt. Aansjloetend aan ’t opbrènge volg de offesjeel insjtelase van Thierry pes de 89e Sjtadsprins van De Marotte, mit de ‘aed aan ’t vaenke’, ’t oetreike van de bie ’t prinssjap beheurende teikes, ’t veurlaeze van de proklemase en de bekendmaking van zien perseunlikke motto. Tradisjoneel trakteiert de nuuje Sjtadsprins alle aanwezige op ein nonnevot aan ’t enj van de zitting.

Losse Kaarte veur de insjtallasezitting zeen op donderdig tössje 10.00 en 14.00oere en op zaoterdig te koup in de Marottewinkel (’t Kallebeske, Sjteivig 33) en verkriegbaar bie de oetbalie van de Sjouwburg.

Bron: De Marotte Zitterd
Foto: Ton Dirkx / De Marotte Zitterd