Societé Zitterd, ein samewirking tössje Senaat, Optochkommitee en de Auw Prinse haet laote weite dat zie in aanloup en tiejes de Vastelaovend 2021 gein activiteite zulle organezeiere. Dit beteikend dat onger de bekende Zittesje Vastelaovesactiviteite es ’t Gala Prinsebal, ’t Kanon van ’t Balkon, De Kènjeroptoch, De Groote Vastelaovesoptoch en de sjörkarre optoch in ’t kommende sezoen neit zulle plaatsj vènje.
De rae veur dees, mit ’t pien in ’t Vastelaoveshart, genomme besjlissing is ’t nog altied rondjwarende Coronavirus en alle geljende (euverheids)maatreigele die motte zörge om ’t virus d’ronger te kriege en te hawte.
Joep Wijnands, veurzitter van Societé Zitterd: “De gezondjheid van mitwirkesj, artiste, optochdeilnummesj en luuj langs de optochroute, kortom álle Vastelaovesvierders, geit baove alles. Bie de activiteite die de Societé normaal organezeiert is ’t echter onmuigelik om consequent te zörge dat deilnummesj ongerling ongerhawve maeter aafsjtand hawte. Op dit moment vènje veer ’t daorom neit verandjwoord om de activiteite tiejes Vastelaovend 2021 te laote plaatsjvènje”.
Toch hèlt Societé Zitterd nog eine sjlaag om de erm. Es d’r, taege de verwachting in, toch positieve verangere zeen rondjom Corona zal Societé Zitterd bekieke of ’t muigelik is om verantjwoorde alternatieve te organezeiere.
Bron: sittard-geleen.nieuws.nl
Foto: VastelaovendZitterd – RBZitterd
