Finale TVK 2021 in Zitterd

2020 Meziek

Zaoterdigaovend 25 Jannewari waar in Cultureel Centrum De Haandert in Tegele de finale van ’t 11e Tiener Vastelaovesleedjes Konkour (TVK). ’t TVK is de zuiktoch nao ’t beste Tiener Vastelaovend tienerleidje van Limburg. Bie de 17 finaliste waar oetkòmmend veur Zitterd de mechelkes van Veier-G, besjtaonde oet Jada, Jolie, Myrthe en Tess, mit ‘t leidje ‘Neit te sjtoppe’.

De wins van ’t TVK 2020 ging nao Isabelle oet Doonder mit ’t leidje ‘Vastelaovend en chill’, de tweede plaatsj waar veur Cheyenne mit häör leidje ‘Vastelaovend is gesjlaag’ en de driede plaatsj ging nao ut duo Puur Plat. Naeve de bie de top 3 plaatsje beheurende baekesj won de top 3 ein vastelaovessjtage bie respectievelik Hoondervel, Marleen Rutten en Big Benny. Zaoterdig 1 Fibberwari zend L1 TV om 18.00oere ein samevatting oet van de finale van ’t TVK 2020.

Tiejes de finale maakte de organezase van ’t TVK bekend dat de finale van ’t Tiener Vastelaovesleidjes Konkour in 2021 zal plaatsj vènje in Zitterd. De finale van ’t TVK 2021 zal waere georganezeiert in samewirking mit Sjtadsvastelaovesvereiniging De Marotte Zitterd en zal plaatsj vènje in op zaoterdig 23 Jannewari 2021 in ’t Forum.
De Marotte Zitterd höbbe al jaore väöl aandach veur de jeugd mit o.a. eine jaorliks vastelaovesaovend sjpisjaal veur en door de jeugd en sjteit op de jaorlikse Marotte CD ein Tienerleidje dat wurt ingezonje es Zittesje deilnummer aan ’t TVK. Wènt de jeugd haet de (Vastelaoves)toekoms!

Foto: Beeldfragment YouTube/ logo TVK