Eesjte Vastelaovessjtehung in Fortuna-stadion!

2020

Vastelaovend in ’t supportesjhome van ein Eredivisie-club ein uniek fenomeen! Op zaoterdigmiddig 1 Fibberwari 2020 sjteit de Milaansjtraot in Zitterd “Oppe kop”: ’t Fortuna Supporters Collectief organezeiert in samewirking mit V.V. De Sjalevaegesj de eesjte Vastelaovessjehung. De aaftrap van de sjtehung is om 15.00oere.

De verfdampe zeen op dat moment nog mèr net verdwene oet ‘t, in de wentjersjtop gans gerenoveierde, Fortuna Home. Nuuj of neit, ’t daak geit d’r aaf! Naeve versjèllende Zittesje artiste (messjien ouch waal LVK-finaliste?), zulle ein aantal weltberuimde Limburgse artiste optraë. Aldje Hendrikx oet Nederweert, baeter bekend es ‘Neppie Beppie’, zörg op jeeder fees dat ’t pebliek zich ‘In d’n Hiemel’ vuilt. En Fees Fees Fees, dao zal Big Benny zeker veur zörge.

DJ Nolke zörge veur de muzikaal omliesting en de neuge ‘flauwekul’, mér veur de richtige humor wurt Berry Knapen ingevlaoge. Knapen won al 8 keer ’t Brabants Kampioenschap tonpraten en sjteit ouch dit jaor weier in de finale.

Kortom: Eine sjtehung dae geer neit wèlt misse. Kaarte koste €11,- en zeen verkriegbaar bie Kafee ’t Hophuys op de mert in Zitterd en in de fanshop bie ’t Fortuna stadion.

Bron en Foto: Fortuna Supporters Collectief