Op de 11de van de 11de is veur ‘t 8e jaor op riej De Greutsje Pin geprizzenteiert. De Greutsje Pin is ein sjpèngske dat jeedere Vastelaovesgek op ziene revaer of patsj kent sjtaeke es teike dat hae greutsj is op de Vastelaovend. Veur dit jaor haet ontwerper Marc Webers gekaoze veur ein ontwerp mit eine kleurrieke Toekan.
Ondanks dat ‘t door alle Corona-maatreigele eine gans angere Vastelaovend zal waere dan geweunlik, waar bie Sjtichting De Greutsje Pin geine twiefel dat ouch dit jaor eine nuuje Greutje Pin zaw versjiene. In dees veur jeederein lestige tied höbbe vereiniginge ’t zjwaor. Doordat alles is aafgelasj höbbe de vereiniginge gein inkomste en haoke sjponsers van evenemente aaf. Door verkoup van De Greutje Pin höbbe de vereiniginge toch nog ein bron van inkomste.
De Greutsje Pin wurt verkoch door ein jaorliks gruijend aantal vereiniginge. Wo in ’t begin de verkoup allein veur Zittesje vereiniginge waar, vlug De Greutsje Pin ongertösje door gans Limburg en zelfs pès in Belsj. De Greutsje Pin haet ein oplage van 2021sjtöks en kos €5,-, daovan geit €3,- nao de vereiniging. Mit ’t koupe sjteunt geer dus rechtsjtreeks de vereiniging van eur eige keuze. De deilnummende vereiniginge zeen te vènje op de website van De Greutsje Pin.
Verkoup Coronaproof
Om de verkoup gans Coronaproof te hawte höbbe de deilnummende vereiniginge dit jaor de muigelikheid om de Greutsje Pin online te verkoupe.Via ein sjpisjaal link of QR-code kènt de Greutje Pin bie de vereiniging waere besjteld. De kuiper krig De Greutje Pin dan via de pos thoes gesjik en de opbrèngs geit rechtsjtreeks nao de vereininging.
De Greutsje Pin is ouch te koup via de webshop op de website van De Greutsje Pin. Taeves zeen nog ein beperk aantal exemplare van eerdere Greutsje Pinne te koup.
Foto en video: Facebook De Greutsje Pin
