Benuimp pès Sjtadsprins d’n heer Thierry Dirkx

2020 Prins

Deze aovend waar in ’t Forum de sfeervolle Oetruipingzitting van Sjtadsvastelaovesvereiniging De Marotte Zitterd. Ein zitting vol protocol, meziek en dans. Om 23.11oere sjteeg de sjpanning pés ‘t hoogtepunt toen, de eerder op de aovend geinsjtalleierde Vors Marot Jan I ‘t Tillegram van de Pappegey ging veurlaeze mit dao op de naam van de 89e Sjtadsprins van Zitterd.

Pés Sjtadsprins van Zitterd is benuimp de heer Thierry Dirkx. Ziene hoogheid zal regeiere euver ’t Marotteriek en d’n eeuwen-awwe Zittesje Vastelaovend onger de naam Sjtadsprins Thierry I. Zien Prinselik palies légk aan de Karel van Bronckhorstlaan 20 in Obbeeg. Thierry is de eesjte Sjtadsprins van Zitterd dao woont boete de grenze van de auw gemeinte Zitterd, aevel waal bènne de ‘nuuj’ gemeinte Zitterd-Gelean.

Thierry tòmmert hel aan de waeg es zènger. Zo haet hae al versjèllende singles oetgevrach die o.a. reigelmaotig op L1 radio zeen te beloestere. In de Vastelaovestied vormp hae same mit Maxime Tummers ’t duo Sjtóm Toeval. In 2019 zonge zie de Zittesje sjlaager ‘1,2 3, Vastelaovend’, womit zie ein plaatsj in de finale van ’t LVK behaolde.

’t Zenge zit bie Thierry in de femieje. Ziene pap René Dirkx haet al mènnig leidje op de Marotte CD’s gezonge. Extra bezunjer is dat René Dirkx dit jaor de zenger is van de Marotte sjlaager ‘Mènnigmaol roup ich Alaaf!’. Hae maag dus ein sezoen langk es prinsevader de sjlaager en taeves ’t liefleid van ziene eige zoon Sjtadsprins Thierry I zènge!

Mee infernase euver de nuuje Sjtadsprins kènt geer laeze op dees pagina <klik>