Zös nuuj lede Wieze Raod De Marotte Zitterd

2020

Bie de sjtart van ’t Vastelaovessezoen 2019-2020 insjalleierde De Marotte Zitterd zös nuuj lede van de Wieze Raod. In alfabetische volgorde zeen dat: Guido van Haen, Gaston Hendrikx, Peter Schaeks, Mark Willems en Jos Zillekens. Mit dees oetbreijing besjteit de Wieze Raod van De Marotte oet viefteen lede, drie Groot-Vorste en twee ere-leje.

Mit zien 32 jaor, is Guido van Haen ein van de jongste Marotte. Zien takepakket besjteit oet ’t jaor- en kolderblaad De Pappegey en jeug. Guido is zeer maatsjappelik betrokke. Hae is lid van wijkplatform Sittard Centrum en stichting ‘Rondom het ziekenhuis’. Daonaeve is hae aktief sjporter en meziek leifhöbber in de breidste zin van ’t woord. Gaston Hendrikx is al mee es derteen jaore eine van de helle wirkesj achter de sjerme es lid van de technische kemisse van De Marotte. Zo is hae betrokke bie de zaalinrichting, aankleijing, dekor en doezend-en-ein kleinere klusse. Dit zal ouch zien hoofdtaak blieve. Wiejer is Gaston lid van de Klaatsjes.

Peter Schaeks is bekend es deilnummer aan de kènjeroptoch en de groote optoch wo hae al mènnig (Eere)Pries haet gewonne. Vol passie en plezeier trek hae mit in de optochte, wo hae gaer ‘sjpeelt’ mit ’t pebliek. Es lid van de zanggrop Driej & Ein haet hae meermaols deilgenomme aan ’t Zittesj Vastelaovesleidjes Konkoer en sjteit hae op mènnig buun bie zittinge en aktiviteite. Es kemisselid techniek is Peter al jaorelangk aktief veur De Marotte. Mark Willems, dae al van kèndjs aaf aan Vastelaovend viert in Zitterd, kènt alle facette van ’t eeuwen-awwe volksfees. Zo is de vastelaovesvierder beveurbeeld ouch ein van de oprichtesj van de Sjalevaegesj. Mark is kompenis van tal van leidjes en deilnummer aan ’t Zittesj vastelaovesleidjes Konkoer. Al ein aantal jaore is Mark lid van de jeugkemisse van De Marotte. Es nuuj lid van de Wieze Raod wèlt hae ouch ein sjteinke biedrage aan de meziekkemisse.

Reinhard Wind, gebaore zoon van wijlen Marot Ben Wind, kreeg Vastelaovend mit de paplaepel ingegaeve. Ziene eesjte optoch leip hae al op 8-jaorige laeftied es lid van de drumband van de Philhermenie. Daonao haet hae in versjèllende Zittesje zaate hermeniekes gesjpeeld. In de meziek lègk dan ouch zien primaire takepakket. Jos Zillekens, waar in 1994 prins van C.V. de Koelköp Sanderbout. Saer november 2009 is hae lid van de Prinsegarde Zitterd, wovan hae de letste vief jaor penningmeister is.

De toekóms make veer same!

De Marotte laote weite dan ’t Zöstal nuuje lede van de Wieze Raod hun sjouwesj wèlt zètte onger ’t wiejer oetboewe van d’n eeuwen-awwe Zittesje Vastelaovend. Tradieses in ere hawte, mèr veural de kanse die in de toekom lègge opzuike en oppakke. Vernuujend bezig zeen om Vastelaovend in Zitterd veur de kommende gesjlachte veilig te sjtelle. Daobiej gaeve zie alle aan väöl waerd te hechte aan ’t sjpoedig hersjtelle van de relase mit de Auw Prinse, ’t Optoch Kommitee Zitterd en de Senaat van de Marotte. ‘’t Verleje is neit te verangere, de toekoms make veer same!’ is hun gezamelik motto. Dan is en blif Vastelaovend dat sjoone fees in ’t Marotteriek.

Bron: De Marotte Zitterd
Foto: De Marotte Zitterd