Zittesje leidjes in finale van LVK, TVK en KVL

2019 Meziek

Veur ’t eesj in de historie van de in 1881 opgerichte Sjtadsvastelaovesvereiniging De Marotte Zitterd score de drie leidjes van ’t sezoen ein finale plaatsj in de versjèllende konkoerse. De leidjes sjtaon alle drie op de cd ‘1, 2, 3 Vastelaovend’, ein produksie van Studio Theelen oet Munstergelaen.

Kènjerleidje
Saer 2008 zètte De Marotte jaorliks ein kènjerleidje op de Marotte CD van ‘t sezoen. Dit is ein van de talrieke initiatieve om de jeug te bènje aan d’n eewen-awwe Zittesje Vastelaovend. Jeeder jaor is ein angere basissjool aan de beurt om hiej aan mit te wirke. Ein projek dat op alle sjole mit väöl enthousiasme wurt ontvange. Väöl sjole laote ’t neit bie eine keer en zètte ‘de flow’ wiejer mit eine eige aanpak. Daovan zeen d’r väöl suksesvolle veurbeelder. ’t Kènjerleidje van dit sezoen ‘TisNeitNiks’ wurt gezonge door kènjer van OBS de Sjtadssjool, die aafgeloupe jaor ’t KVL, ’t Kinjer Vastelaovend Leedjesfestivel, wonne en ouch dit jaor weier in de finale sjtaon. In de finale sjteit ouch OBS Aan de Meule, ein van de sjole die in ’t verleje ’t kènjerleidje haet gezonge en noe weier ein leidje höbbe gemaak.

Nuuj Generase
De Marotte sjlaager van dit jaor ‘1, 2, 3 Vastelavend’, gezonge door Sjtóm Toeval, is ein van de twintig finaliste van ’t Limburgs Vastelaovesleidjes Konkour (LVK). De Marotte zeen dao bezunjer greutsj op. Ein bewies dat de nuuj generase sjtevig aan de deur klop. Maxime Tummers en Thierry Dirkx wonne in Augustus ’t Zittesj Vastelaovesleidjes Konkour. Saer dae tied kriege zie ’t eine nao ’t anger komplement en is ’t duo eine ambassadeur van Zitterd en ein bewis dat Vastelaovend in Zitterd in meerdere generases volop laef!

Zowaal ’t Kènjerleidjes es de wènnende sjlaager zeen oet de handj van de suksesvolle sjriever Thei Wessels. Thei sjreef same mit Quinn Warmerdam (meziek) ouch ’t nómmer ‘Laot ós mer sjuve’ van ’t Zittesje duo Jesse & Jesse’. Ouch zie sjtaon in de finale van ’t LVK. ‘Awwe rot in ’t vak’ Paul-Jean Jessen (57), zèngk dit leidje same mit zien naefke Tristan (20). Ouch de jeugdige Tristan is eine van de jeugdige talante oet ’t Marotteriek.

Tienesj
Tiejes ’t jubbelei 12x11jaor De Marotte in 2014 ontsjtong ’t idee om jaorliks ouch veur de kattegrie tössje kènjer en de volwassene ein leidje op de CD te plaatsje. Zo sjteit dit jaor al veur ’t driede jaor op riej ein tienerleidje op de CD. De veier mechelkes van Veier-G bereikte mit ’t Marotte Tienerleidje van dit jaor ‘Doe dao!’ de finale van ’t Tiener Vastelaovesleidjes Konkour (TVK). Dit leidje is gesjreve door Myrthe Verblakt same mit häöre pap Marc Verblakt.

’t Bereike van de finale is al ein pristase op zich, mer natuurlik häöpe de finaliste op mee. Mèr wat de oetsjlaag ouch wurt: Vastelaovend vierend Zitterd is greutsj!

Bron: De Marotte Zitterd
Foto’s: Arjan Krijntjes