Zittesje leidjes door nao de finale van ’t LVK 2019

2019 Meziek

Deze middig zeen in ein sjpannende oetzending op L1 Radio en facebouk de 20 finaliste van ’t LVK 2019 bekend gemaak. Bie dees 20 finaliste zeen allebei de  Zittesje leidjes die in de hauf finales sjtonge. Nao twee jaor op riej ein LVK finale zonger Zittesje leidjes sjtaon dit jaor twee leidjes oet Zitterd in de finale.

De eesjte Zittesje finalis is ’t duo Jesse & Jesse mit ’t leidje ‘laot os mer sjuve’. De teks is gesjreve door Thei Wessels en de meziek door Quinn Warmerdam. Jesse & Jesse besjteit oet Paul-Jean Jessen en ziene naef Tristan Jessen. Wo Paul-Jean Jessen al meermaols in de finale van ’t LVK sjtong wurt ’t veur Tristan ’t debuut op ’t podium van de LVK finale. In de finale zulle zie optraë op nömmer 13.

Tristan Jessen, de hèlf van ‘t duo Jesse & Jesse

De tweede Zittesje finalis is ’t jeugdige duo Sjtóm Toeval mit de Zittesje sjlaager ‘1 2 3 Vastelaovend’. De teks en meziek zeen gesjreve door Thei Wessels, dae dus mit twee leidjes in de finale sjteit. Sjtóm Toeval besjteit oet Thierry Dirkx en Maxime Tummers. Naodat zie veur de eesjte keer ’t Zittesje Vastelaovesleidjes Konkour wonne is dit ouch hun debuut in de finale van ’t LVK, wo zie es nömmer 18 zulle optraë.

Bliesjap bie ‘t duo Sjtóm Toeval (Maxime en Thierry)

De finale van ’t LVK is op vriedig 15 Fibberwarie in ’t MECC in Mesjtreich.

Mee infermase euver ’t LVK en alle 20 de finaliste zeen te vènje op de websait van de Stichting LVK.

Foto’s: Stichting LVK / L1 facebook