Vastelaovesmaondig: Tröötekonkoer

2019 6 Daagse

Vastelaovesmaondig, 4 Meert, is tradisjoneel de daag van de Zittesje kapelle en zaate Hermeniekes. De kapelle sjpele op de Mert, bie de Sjtadspomp oppe Lömmerichersjtraot (kafee de Kup), in de Helsjtraot bie kafee ‘t Duvelke en op ’t Kirkplien bie kafee ’t Sjterfhoes.

Om 15.00oer wurt ’t Tröötekonkour op de Mert geäöpent door Sjtadsprins Rob I en de Marotte. Aansjloetend trèkke de kapelle rondj en laote zie vanaaf de podiums de Vastelaovesklanke klinke, wo de kapelle ongeveer 20menuut zulle sjpele. ’t Tröötekonkour wurt aafgesjlaote op de Mert mit ein konzèr vol sjpektakel van kapel Trööt in de Gööt.

Sjtadsprins Rob I zal versjèllende prieze oetreike aan o.a. de sjoonst verkleide Sjnaak, ‘t sjoonst verkleide Mechelke, de sjoonste grop en eine sjpesjale Prinse Pries.

De kapelle die deilnumme aan ‘t Tröötekonkour zeen o.a.: De Zittesje Kènjerkapel, ‘t Hermenieke, kapel Hou op die Kis, de Sjwaegelebend, kapel TisNiksentWurtNiks, Zaate Fanfaar Noots Biejein, BBC, Sjtadskapel ‘t Trumke en ’t Tröötje, kapel Aafsjlaag Zitterd en Trööt in de Gööt.

Update 4 Meert:
Trööt in de Gööt haet op hun Faceboukpagina bekend gemaak dat zie dit jaor jaomergenog neit kénne optraë op ‘t Tröötekonkour.

Foto: VastelaovendZitterd – RBZitterd