De Marottekapel, de hoes kapel van De Marotte, verzörg tradisjoneel de muzikaal omliesting bie de zittinge. Naeve de zittinge van de Marotte verzörg de Marottekapel ouch jaorliks de muzikaal omliesting bie de zittinge in De Baenje en De Kolleberg. Dit doon zie tradisjoneel mit veural väöl Zittesje Vastelaovesleidjes. Nao ’t aafsjloete van de reeks Zittinge zal De Marottekapel ouch mit de Vastelaovesdaag häör muzikaal Vastelaovesklanke laote klinke.
Op de donderdig veur de Vastelaovend, 28 Fibberwarie, is ’t ongertössje tradisjoneel Auw-Wieverkonzèr in kafee ’t Duvelke aan de Helsjtraot. Vanaaf 21.11oer vermaak de Marottekapel, veur ’t letste jaor onger leijing van dirigent Jan Hungens, de auw wiever en anger laammaekesj mit veural (auw) Zittesje Vastelaovesleidjes.
Twee daag later op Vastelaoveszaoterdig, 2 Meert, zal De Marottekapel ein optraë verzörgde op ’t Kanon van ’t Balkon. Hie brénge zie richtig Zittesje Vastelaovesklanke, wo bie zie waere ongersjteund door versjèllende Zittesje zengesj. Ouch dit jaor zulle zie de bomvolle Mert weier oetdage om oet volle borst mit te zènge mit ‘Zitterd Allein’.
Foto: Arjan Krijntjes
