Trökblik finales van ‘t KVL, TVK en LVK

2019 Meziek Video

Veur ’t eesj in de historie sjtonge dit jaor Zittesje leidjes in de finales van de drie grote Vastelaovesleidjes Konkourse: ’t Kinjer Vastelaovend Leedjesfestival (KVL), Tiener Vastelaovesleedjes Konkour (TVK) en ’t Limburgs Vastelaovesleedjes Konkour (LVK).

KVL:
Op zondig 10 Fibberwarie waar in Hael de finale van ’t Kinjer Vastelaovend Leedjesfestival. In de finale sjtonge twee Zittesje sjoole: OBS Aan de Meule mit ’t leidje ‘Ravotte’ en de KVL wènnesj van aafgeloupe jaor, OBS de Sjtadssjool, mit ’t Marotte Kènjerleidje ‘TisNeitNiks’. Beide sjoole behaolde in de finale ein gedeilde veierde plaatsj. De wènnesj van ’t KVL 2019 zeen De Gekke Jetjes oet Grubbevors mit ‘Rieje Diek’.

TVK:
Op zaoterdig 9 Fibberwarie waar in venray de finale van ’t Tiener Vastelaovesleidjes Konkour. In de finale sjtonge veur Zitterd de veier mechelkes van Veier-G mit ’t Marotte Tienerleidje ‘Doe Dao!’. Ondanks dat zie neit in de top 3 eindigde wonne zie op ’t TVK waal eine sjoone pries. Zie wonne de veur de jongere belangrieke pries veur de béste prizzentase Vlog. De winst van ’t TVK ging nao de grop Verrékkes Moj oet Venray mit ‘R.I.T.M.E.’, zie wiste ’t TVK veur ’t tweede jaor op riej te wènne.

LVK:
In ein aafgelaaje Mecc in Mesjtreich (ruum 7000 bezuikesj!) waar op vriedigaovend 15 Fibberwarie de finale van ’t Limburgs Vastelaovesleidjes Konkour. Nao twee jaor op riej zonger Zittesje leidjes in de finale wiste dit jaor twee Zittesje leidjes ein plaatsj in de finale te behaole. Nonk Paul-Jean Jessen sjtong same mit naefke Tristan Jessen es ’t duo Jesse & Jesse in de finale mit ’t door Thei Wessels en Quinn Warmerdam gesjreve ‘Laot os mer sjuve’. De tweede Zittesje finalis waar ’t jeugdige duo Sjtóm Toeval (Thierry Dirkx en Maxime Tummers) mit de door Thei Wessels gesjreve Marottesjlaager 2019 ‘1, 2, 3 Vastelaovend’.

In de finale behaolde Jesse & Jesse ein 14de plaatsj en eindigde Sjtóm Toeval op de 17de plaatsj. De winst van ’t LVK ging nao Hoondervel mit ‘Groete oet de Fieësttent’. De tweede plaatsj ging nao de wènnesj van 2018 Spik & Span mit ‘Weer tèlle aaf’ en de driede plaatsj nao Bjorn & Mieke mit ‘Nog Efkes’.

De optraës van de Zittesje finaliste zeen hiej onger te bekieke:

Finale KVL: OBS de Sjtadssjool

Finale KVL: OBS Aan de Meule

Finale TVK: Veier-G

Finale LVK: Jesse & Jesse

Finale LVK: Sjtóm Toeval

Alle optraës van ‘t KVL en LVK zeen te bekieke op ‘t Youtube kanaal van L11 Alaaf.

Beelden: YouTube L11 Alaaf (KVL en LVK) en Facebook Veier-G (TVK)
Foto: beeldfragment youtube L11alaaf