Saer dit sezoen maak gebaore Broukzitterder Thei Winkler (54), getrouwd mit Gertie en vader van Céline en Nick, deil oet van de Wieze Raod van Sjtadsvastelaovesvereiniging De Marotte Zitterd. Hae is aktief bie de technische commissie, jeugdzake en kontakte mit (boetelandse) vereiniginge.
Thei is in ’t dagelikslaeve Supervisor bie Sitech Services. Al jaorelangk is hae lid van de Grosse Kölner en same mit zien gezin bie Klup de Sjnaake oet Broukzittert. Ouch waar hae lid van de Prinsegarde Zitterd. Bie aktiviteite es Sint Rosafestival, Oktoberfees en Sint Joep is hae ein van de vaste bezuikesj. Zien anger hobby’s zeen wanjele, wèntjersjport, konzèrs bezuike, motorrieje en reize. Hae is supporter van Fortuna Sittard en 1e FC Köln. Daonaeve is hae sjteunend lid bie CV de Bessemebènjers in zien woonplaatsj Bor.
Van kèndjs aaf aan haet Thei Vastelaovend gevierd in Zitterd. Versjèllende kere is hae in de prieze gevalle bie ’t Tröötekonkoer. Es eingelgänger en köppelke haet hae de neudige kere deilgenomme aan de Groote Optoch. De Marot wilt Vastelaovend in Zitterd breid oetdrage en d’r veur zörge dat de jeug mee betrokke wurt.
Thei: “Vastelaovend mot mitgaon mit de huidige tied, wobie de Zittesje tradieses en gebroeke in ere waere gehawte. Om dit doel te realizeiere, zulle alle betrokke vereiniginge de henj in ein motte sjlaon en samewirke, wodoor de eewen-awwe Vastelaovend tot boete de sjtadsgrenze wurt gepreze.”
Bron: De Marotte Zitterd
Foto: Arjan Krijntjes
