’t Is veurbiej… ’t Is gedaon…

2019

‘t Is Veurbiej… ‘t Is Gedaon, mer wat waar ‘t weier sjoon. Ein daverend en langk sezoen mit es motto ‘1, 2, 3 Vastelaovend’. Nao drök bezochde bènne aktiviteiete ging Vastelaovend ‘de sjtraot op’. De Kènjeroptoch trok bie ein veurjaorszönke en de doezende luuj sjtonge dan ouch riejedik langs de kantj.

Op donderdig veur de Vastelaovend waar mit de Nach van ’t Auwt Wief eine raegenechtige aaftrap van de Zittesje Vastelaoves 6-Daagse. Eine daag later op vriedig sjtong de Mert vol mit doezende sjoliere bie ’t Sjloere Vastelaovend. Ouch op Vastelaoveszaoterdig bie ‘t kanon van ‘t Balkon weier eine bomvolle Mert en eine super sfeer bie opträes van o.a. La Bamba, Marleen Rutten, Beppie Kraft en Trööt in de Gööt.

Op Vastelaoveszondigzondig trok bie gries mèr dreug waer eine sjitterende en kleurrieke Optoch vol aktualiteit door de sjtraote van ’t Marotteriek. Eine sjtraolende Sjtadsprins Rob I sjloot hoog baovenop ziene Prinsewaage de optoch aaf. Op Vastelaovesmaondig trokke wie vanouds de Zaate Hermeniekes en kapelle rondj mit ’t Tröötekonkour en ’s aoves trok bie gelaeg van 5×11 jaor Optoch Kommitee de eesjte Sjörkarre Optoch door Zitterd. Op Vastelaovesdaensdig waar weier ‘t tradisjoneel Appelesienesjmiete, wonao om 22.33oere op ’t Kloosterplien ‘t Maske woort begrave.

Mit ’t Maske Begrave kwaam weier ein enj aan Vastelaovend 2019. Sjtadsprins Rob I sjtraolde ‘t ganse sezoen langk, ’t waar euveral ‘1, 2, 3 Vastelaovend’. De Vastelaovend in oos Zitterd Sjittert!!

Ein korte trökblik op ’t sezoen:

25 Augustus: In de sjpeigeltent op ’t Sint Rosafestival wurt de ‘1, 2, 3 Vastelaovend’ gekaoze pès Sjlaager 2019 gekaoze. De sjlaager wurt gezonge door ’t jeugdige duo Sjtóm Toeval en is gesjreve door Thei Wessels

11 November: Op ’t Kloosterplien wurt ’t Vastelaovessezoen 2018-2019 offesjeel geäöpend. Bie des sfeervolle äöpening wurt de Marotte CD geprizzenteierd en ware opträes van o.a. Big Benny en Spik & Span.


5 Jannewarie: Op de oetruipingsaovend wurt Marc Webers door De Marotte benuimp pès Ridder in de Orde van de Pappegey

5 Jannewarie: Op ’t podium van de grootezaal van de Sjouwburg is de oetruipingsaovend van De Marotte. Om 23.11oere wurt door de Groot Vorste van De Marotte de heer Rob Goossens oetgeroupe pès Sjtadsprins 2019

19 Jannewarie: In de Sjouwburg is de insjtelasezitting. Nao ’t plökke van Sjtadsprins 2018 León Kaminski wurt Rob Goossens, door Groot Vors Harie I, geinstalleiert pès Sjtadsprins Rob I, de 88e Sjtadsprins van Zitterd.

9 Fibberwarie: In de finale van ’t Tiener Vastelaovesleedjes Konkour (TVK) sjtaon veur Zitterd de mechelkes van Veier-G. In de finale wènne zie de preis veur de bèste prizzentase Vlog.

10 Fibberwarie: In Hael is de finale van ’t Kinger Vastelaovend Leedjesfestival (KVL). Veur Zitterd sjtaon in de finale OBS de Sjtadssjool (Kènjerleidje 2019) en OBS de Sjtadssjool.

15 Fibberwarie: In ein bomvol Mecc in Mesjtreich is de finale van ’t Limburgs Vastelaovesleedjes Konkour (LVK). Twee Zittesje deilnummesj haolde de finale: Jesse & Jesse en ’t duo Sjtóm Toeval

15 Fibberwarie: In alle drie de grote Limburgse Vastelaovesleidjes Konkourse (KVL, TVK en LVK) sjtaon Zittesje leidjes in de finale.


16 Fibberwarie: Bie Albert Heijn aan de Bröksjtraot wurt door Sjtadsprins Rob I de Limburgse Vastelaovesposter van kunstenares Miriam Vleugels onthuld. De opbrengs van ’t sjilderie en de posters geit nao de Ronald McDonald Kindervallei.

21 Fibberwarie: In besjlaote krèngk krig Sjtadsprins Rob I ’t eesjte exemplaar van ’t jaorblaad van de Marotte ‘De Pappegey’ aangebao.


24 Fibberwarie: Onger ein sjtraolend veurjaorszönke trèk de Kènjeroptoch door de Zittesje sjtraote. Eine net es de zon sjtraolende Sjtadsprins Rob I maak ziene offesjele intoch in ’t Marotteriek. [OETSJLAAG], [FOTO’S]

2 Meert: Bie ’t Kanon van ’t Balkon weier eine bomvolle mert en eine unieke Vastelaovessfeer


3 Meert: De Groote Vastelaovesoptoch trok door Zitterd [OETSJLAAG], [FOTO’S], [VIDEO]

4 Meert: Bie gelaeg van 5×11 jaor Optoch Kommitee Zitterd trok saoves de eesjte Sjörkarre Optoch van ’t Kirkplien naon de Mert.

5 Meert: In Zöstere wènne de Waageboewesj buurt Sjteivig veur ’t tweede jaor op riej ’t Limburgs kampioensjap Vastelaoveswaages.

5 Meert: De letste daag van de Vastelaovend is tradisjoneel veur ‘t Appelesienesjmiete. Om 22.33oere woort ’t Maske Begrave en is de Vastelaovend weier veur ein jaor veurbiej.

Pès volgendjaor… Vastelaovend 2020 op 23-24-25 Fibberwari!!

Foto: VastelaovendZitterd-RBZitterd / Screenshot YouTube (foto 2) / Arjan Krijntjes (foto 3)