Op vriedig veur de Vastelaovend sjtruimp de Mert weier vol mit doezende sjoliere oet Zitterd en omgaeving om de vastelaovend in te loewe. Sjoliere Vastelaovend is jaore trök sjpontaan begoosj en ongertössje neit mee weg te dènke oet de Zittesje Vastelaoves 6-Daagse. Voor de sjoliere wurt ein muzikaal pregram geprizzenteiert dat doert van 13.30 oer pés ongeveer 18.00oer. ’t Festivalterrein op de Mert is geäöpent vanaaf 13.00oer. Optraë zulle deze middig o.a. de band Hard2Get, Jesse & Jesse, Don Kiesjot, Sjtóm Toeval en Veier-G. DJ Jeroen laven zal door de ganse middig haer zörge veur sjwingende (Vastelaoves)meziek. De Marotte mit Sjtadsprins Rob I zulle ein bezuik brènge aan Sjoliere Vastelaovend.
Ouch bie Sjolierevastelaovend is de regel NIX18, gein alcohol onger de 18jaor. Op vertoon van ‘t liggetemesebewies (paspoort of ID-kaart) kriege bezuikesj van 18jaor en awwer ein polsbendje. Allein op vertoon van dit polsbendje is drank mit alcohol te kriege. Komsumpsies zeen allein verkriegbaar mit de ‘Sjpaspas’ van Stichting Horeca Markt Sittard. Mee infermase euver de ‘Sjapspas’ is te venje op www.sjpaspas.nl
Sjoliere Vastelaovend is ein ongerdeil van De Zittesje Vastelaoves 6-Daagse. De zesdaagse is ein samewirking van de gemeinte Zitterd-Gelaen, Horeca Mert Zitterd, Sjtadsvastelaovesvereiniging De Marotte Zitterd, Optochkommitee Zitterd en Sjtadskapel ’t Trumke en ’t Tröötje. Alle aktiviteite zeen GRATIS toegankelik. Echter haet jeeder evenement eine angere opzàt en anger eise aan veiligheid.
Dit beteikend dat bie Sjoliere Vastelaovend de Mert zal ingerich waere es festival terrein. De entree nao de mert is allein muigelik via de Lömmerichersjtraot en via de Paesjsjtraot. ’t Is neit toegesjtaon om karre en eige drank mit te numme. Hie zal bie de ingeng op waere gecontroleiert. Wiejer zeen d’r hoesreigels van toepassing op de Mert.
Mee infermase euver Sjoliere Vastelaovend is te venje op feesbouk: www.facebook.com/scholierencarnavalsittard
Foto: Facebook Scholierencarnavalsittard
