Äöpening van ’t sezoen, kawd mèr Sfeervol

2020 Foto

Op de 11de van de 11de is door Sjtadsvastelaovesvereiniging De Marotte Zitterd op ’t Kloosterplien ’t nuut Vastelaovessezoen geäöpent. Naeve De Marotte mit regeierend Sjtadsprins Rob I ware oet ‘Groot-Zitterd’ CV de Narre Euverhaove, De Mechelkes oet Broukzittert, CV De Klumpkes en CV de Kempernaaze oet Vrangendael-Kemperkoul mit hun Prinse, Prinses en Jeugd Prinse prezènt bie de äöpening van ‘t sezoen. Ondanks dat ’t waterkawd waar hawwe ein paar honderd luuj de waeg nao ’t Kloosterplien weite te vènje om same de äöpening van ’t sezoen te viere.

De zèngesj van de nuuj sjlaagesj op de nuuj Marotte CD ‘Mènnigmaol roup ich Alaaf’, Kindcentrum Sittard (Kènjerleidje), Cheyenne (Marotte Tienerleidje), Sjtóm Toeval en LVK toppesj De Geliënde, De Toddezèk en de wènnesj van ’t LVK 2019 Hoondervel wiste de sjtömming d’r goud in te brènge. Door de luuj woort al flink mit gezonge en gesjoekeld en zelfs de polonais ging rondj op ’t Kloosterplien.

Veur de offesjeel äöpening van ’t sezoen maakte ’t Maske de intoch, wonao De Marottekapel ‘Hoog ‘t Rood Gael Gruin’ sjpeelde. Aansjloetend waar ’t aan de aanwezige Prinse en Prinses om de klok te onthulle die geit aaftélle nao Vastelaoveszaoterdig 23.11oere es de nuuje Sjtadsprins oet henj van Burgemeister Sjraar Cox de sjleutel van de sjtad krig euvergedrage.

De Marottekapel sjpeelt ‘Hoog ‘t Rood, Gael, Gruin

Es aafsjloeting van de äöpening woort same mit De Mander en Zitterd Same nao de Mert getrokke wo door Sjtadsprins Rob I en Prins Sander I van CV de Kempernaaze ’t Maske woort opgehange aan ’t balkon van Kafee De Kroon. ’t Maske zal dao pès Vastelaovesdaensdig middernach blieve hange es teike dat ’t Vastelaovend is.

Foto en Video: VastelaovendZitterd – RBZitterd