Zondig 20 Jannewarie is in ’t Forum Theater aan de Engekampsjtraot de tradisjonele Prinseresepse van Sjtadsvastelaovesvereiniging De Marotte Zitterd. Tössje 13.25 en 17.00 oer is jeederein oetgeneudig om Sjtadsprins Rob I, dae de aovend teveur is geinsjtalleiert, te filleseteiere mit zien Prinssjap. Nao aafloup van de fillesetases is nog eine gezellige naozit. De Prinseresepse wurt jaorliks aangebao en georganezeiert door de Senaat van de Marotte.
De resepse wurt aafgetrap mit ein optraë van OBS de Sjtadssjool mit ’t Marotte Kènjerleidje ‘Tisneitniks’. De Sjtadssjool besjteit in 2019 tweehonderd jaor en lègk in dit leidje eine link tössje de sjool en Vastelaovend.
Door de ganse middig haer zal de Marottekapel de resepse op de buun muzikaal oploestere. Ouch veur kapelle die Sjtadsprins Rob I muzikaal wille filleseteire is genog ruumte. Wiejer zeen d’r onger de resepse optraes van o.a. Veier-G mit ’t Marotte Tienerliedje ‘Doe dao!’ en brèngk Sjtóm Toeval de Marotte sjlaager 2019 ‘1, 2, 3 Vastelaovend’.
Veur de kenjer is een apaarte ruumte mit volop annemase, zie kenne zich onger angere laote sjminke en versjèllende sjpelkes sjpele. Nao aafloup wurt jeederein verrasj mit ein kleine attensie.
Bron: De Marotte Zitterd
Foto: Arjan Krijntjes
