Optochdeilnummesj vergadering

2019 Optoch

Jaorlik organezeiert ’t Optoch Kommitee Zitterd ein vergadering veur alle deilnummesj en potensjeel deilnummesj aan de Zittesje Optochte. Dees vergadering is op vriedig 25 Jannewarie e.k. om 20.30 oer ‘Op de Sjans’ in de Zittesje Optochhal.

’t Optoch Kommitee wèlt op dees vergadering de deilnummesj infermeiere euver zake die aafgeloupe jaor nao aafloup van de Optochte zeen ingebrach en wo-aan de aafgeloupe maonje is gewirk. Ongerwerpe die aanbod komme zeen de roetes van de optochte, de ‘läöker’ in de Optochte, de veiligheid, ’t priesbeleid, de zjurieregelemente, ’t projek kèrkes, ongerhoud Optochhal en nog väöl mee. Taeves is de muigelikheid veur ‘t sjtèle van eur vraoge rondj deilname aan de Optochte.
Jeederein is veur dees vergadering van harte oetgeneudig.

Aafsjied Roy Moerskofski en Äöpening van de ‘sjans’
Aansjloetend aan de vergadering, rond 22.00oere, zal ’t Optoch Kommitee aafsjied numme van Roy Moerskofski, dae nao ruum 18jaor haet besjlaote om ’t Optoch Kommitee te verlaote. Roy waar jaore langk aktief es Optochsamesjteller en ’t aansjpraekpunt veur de Optochdeilnummesj. Taeves waar Roy de sjpraeksjtalmeister van ’t Optoch Kommitee bie de optochte en bie de Priesoetreiking.

Daonao zal ‘de Sjans’ veur dit sezoen weier offesjeel geäöpend waere en is de tied om nog get te klassjeneiere. Ein hepke en ein drenkske waere aangebao door ‘t 5×11 jaorig jubbeleirende Optoch Kommitee.

Bron: Optoch Kommitee Zitterd
Foto: VastelaovendZitterd – RBZitterd