Oetruipingszitting mit insjtelase Vors Marot Jan I

Op Zaoterdig 4 Jannewari is vanaaf 20.00oere in ’t Forum de Oetruipingszitting van Sjtadsvastelaovesvereiniging De Marotte Zitterd. Eine gevarieierde aovend mit offesjeel momente, meziek, kolder en protocol. De zaal is geäöpend vanaaf 19.00oere.

Ridder, Vorst Marot en stadsprins
De tradisjonele illemente van de oetruipingszitting zeen de bekendmaking van de Ridder in de Orde van de Pappegey en de oetruiping van de nuuje Sjtadsprins. Uniek deze aovend is de insjtelase van Jan Janssen pès Vors Marot Jan I. Ein plechtig en historisch moment.

Daonaeve is d’r humor van buuttereedner en Tienerbuutekampioen 2019 Dylano Driessens, in de rol van Gouverneur van Limburg. Meziek is d’r van Richtig Rex, eine vrunj van de nuuje Vors Marot, leidjes van de Marotte CD ‘Mènnigmaol roup ich alaaf!’, Sjtóm Toeval, Koeraasj en de grop Palaver mit Kölsche covers. De muzikaal omliesting is in de vertroewde henj van de Marottekapel. Es klap op de vuurpiel is ’t De Marotte gelök om de Tanzgruppe Zunft Müüs oet Kölle te kontrakteiere. Zo wie ze in Dutsjlandj zégge “Spitzenklasse!”.

Rondj de klok van 23.00oere zal de naam van de 89ste Sjtadsprins van Zitterd bekend waere gemaak. Volges tradiese is de nuuje Prins zelf neit aanwezig, dit is veur zowiet bie de Marotte bekend, uniek in de Vastelaoveswelt. Aansjloetend sjtart ’t Marottebal mit Zaelke Power. Tegeliek gaon de Bielemen op paad om in de kafees van Zitterd ’t ‘Tillegram van de Pappegey’, ’t bekende affiche mit de naam en de foto van de Marotteprins, te brènge.

Kaarte veur de oetruipingszitting zeen te koup bie de Marottewinkel (‘t Kallebeske, Sjteivig 33) en onlain via de website van ’t Forum.

Bron: De Marotte Zitterd
Foto: Facebook Palaver oes Vols