Oetruipingszitting Marotte Sjtadsprins 2019

2019 Prins

Zaoterdig 5 Jannewarie e.k. is vanaaf 20.00oere in sjtadssjouwburg ´De Domijnen´ de oetruipingszitting van Sjtadsvastelaovesvereiniging De Marotte Zitterd. Eine aovend mit offesjeel momente, meziek, kolder en protocol. De zaal is vanaaf 19.30 oer geäöpent.

Ridder en Sjtadsprins

Protokolis Thijs Jacobs bewaak ‘t Tillegram van de Pappegey pès de oetruiping

De zitting véngk plaatsj op ´t tot sfeervolle zittingszaal omgeboewde podium van de grotezaal van de sjouwburg. In dees intieme omgaeving sjtart ´t nuuje jaor in ein ontsjpanne sfeer. De tradisjonele illemente van de oetruipingszitting, de bekendmaking van de Ridder in de Orde van de Pappegey en de naam van de nuuje Sjtadsprins vorme de vaste ongerdeile van deze aovend.

Daonaeve zörg buuttereedner Bas van Neer veur de neudige humor. Meziek is d’r van Zittesje zengesj van de Marotte CD ‘1, 2, 3 Vastelaovend’ en van de grop Kölsch Platt. De muzikaal omliesting is in henj van de Marottekapel. Es klap op de vuurpiel is ’t De Marotte gelök om de Dutsje dansgrop Westerwaldsterne Blau Weiss te kontrakteiere, eine dansgrop van “spritzenklasse!”

Rondj de klok van 23.00oere zal de naam van de 88ste Sjtadsprins van Zitterd bekend waere gemaak. Volges tradiese is de nuuje Prins zelf neit aanwezig, dit is veur zowiet bie de Marotte bekend, uniek in de Vastelaoveswelt. Aansjloetend sjtart ’t Marottebal mit Zaelke Power. Tegeliek gaon de Bielemen op paad om in de kafees van Zitterd ’t vernuujde ‘Tillegram van de Pappegey’, ’t bekende affiche mit de naam en de foto van de Marotteprins, te brènge.

Kaarte zeen in de veurverkoup te koup bie de Marottewinkel (damesmode Van Neer Eyckeler, Brandjstraot 11), geäöpent donderdig van 10-14oere en zaoterdig van 10-17oere. Es de zitting in de veurverkoup neit is oetverkoch, dan zeen op de aovend bie de sjouwburg nog kaarte te koup.

Bron: De Marotte Zitterd
Foto’s: Ton Dirkx / Arjan Krijntjes