Nuuj route veur de Groote Optoch

2019 Optoch

’t Jubbeleierende Optoch Kommitee Zitterd (5×11 jaor) haet de route veur de Groote Vastelavesoptoch, op zondig 3 Meert bekend gemaak. Ten opzichte van aafgeloupe jaor zal de route dit jaor waere aangepas.

In 2018 haet ’t Optoch Kommitee gekaoze veur ein route die ein sjtök korter waar dan de jaore daoveur. Oet evaluase en reaksies van de deilnummesj bleek dat dees route es leuk woort ervare, mer ouch waal es erg kort. De korte route zörgde taeves veur zoväöl pebliek in de sjmaal sjtraote van de bènnesjtad, dat de doorkomst van de groote Vastelaoveswaages soms geveerlik woort. Daonaeve waere väöl opsjtoppinge, wat läöker in de optoch tot gevolg haw. De konklusie van ’t Optoch Kommitee waar dan ouch dat de route weier get langer moosj waere.
Vanoet de deilnummesj ware positief reaksies euver ’t feit dat de lus Rosmeulesjtraot, Engelekampsjtroat, Leijebroukerwaeg oet de route waar gehaold. Dao sjtong waal taegeneuver dat de opkoms vanoet de Pötsjtraot nao de Mert, dat veur väöle ’t hoogtepunt van de optoch is, waar vervalle. Wiejer bleek ouch de ontbènjing op ’t Ligneplien gein sukses.

‘t Optoch Kommitee haet de letste maonje dan ouch väöl wirk gehad aan de Optochroute. Kiekend nao de zake wo raekening mit mot waere gehawte (o.a. bereikbaarheid, verkeer, openbaar vervuijer, veiligheid, de Groote Vastelaoveswaages) haet ’t Optoch Kommitee ein nuuj route veur de Groote Optoch gemaak.

Grootste wieziging is dat de opsjèlling van de Groote Optoch wurt verplaatsj van ’t Maaslandpark nao de Leijebroukerwaeg en Engelekampsjtraot. De Optoch zal sjtarte baovenaan de Pötsjtraot dae weier trök kump in de route. Vanoet de Pötsjtraot zal de optoch de eesjte keer euver de Mert trekke richting de Auw Mert. Es grote finale zal de optoch vanaaf de Sjtaasedwaesjsjtraot door de bènnesjtad nao de Mert trèkke wo de Optoch zal waere ontbondje.

De Route:
Pötsjtraot (1) – Mert (2) – Auw Mert (3) – Kloosterplien (4) – Daeke Tijssesjtraot (5) – Ligne (6) – Willie Hillensjtraot (7) – Riekswaeg Noord (8) – Euverhaovenersjtraot (9) – Walramsjtraot (10) – Parallelwaeg (11) – Sjtaasedwaesjsjtraot (12) – Sjteivig (13) – Veursjtad (14) – Brandsjtraot (15) – Lömmerichersjtraot (16) – Mert (17)

Bron: Optoch Kommitee Zitterd
Foto: VastelaovendZitterd – RBZitterd
Aafbeelding: Optoch Kommitee Zitterd