In ein sfeervolle Sjpeigeltent ‘Crystal Palace’ op ’t Sint Rosa-festival waar ’t Zittesj vastelaovesleidjes Konkoer en is de Zittesje Vastelaovessjlaager veur ‘t Vastelaovessezoen 2019-2020 gekaoze. Zitterd is daomit tradisjoneel de eesjte plaatsj in Limburg wo de nuuje sjlaager wurt gekaoze. Op ’t ZVK sjtonge 11 leidjes, wovan 1 leidje door femieje omsjtandighede van ein van de zèngesj waar oetgevalle. De ellef leidjes woorte laif gezonge door Zittesje zengesj, wobie de meziek al eerder waar opgenomme. De prizzentase van de aovend waar in henj van regeierend Sjtadsprins Rob I. Gezjureiert woort door ein vak-/prominentezjurie en alle aanwezige die op ‘t sjtömbiljet hunne top 3 invulde.
Pès Vastelaovessjlaager 2020 is gekaoze ‘Mènnigmaol roup ich alaaf´ gesjreve door Phil Schaeken en wurt gezonge door René Dirkx. René Dirkx is daomit es zènger van de sjlaager de opvolger van ziene zoon Thierry, dae aafgeloupe sezoen es de helf van ’t duo Sjtom Toeval de Marottesjlaager zong. Onger ein groot applaus van alle aanwezige krege Phil Schaeken en René Dirk oet henj van Marianne Hunnekens-de Kok de Thei Hunnekens wisseltroffee oetgereik.
De tweede plaatsj ging ‘t leidje ‘’t Pappegeyke’ gesjreve door Reinhard Wind en gezonge door Michele Tummers. De driede plaatsj ging nao de debutante Gé van Beek en Wim Roeffen mit ’t door Tam Tam gezonge leidje ‘Veer zeen toch allemaol femieje‘. Op de veierde plaatsj eindigde ‘Laot os éns wénke‘ gesjreve door Elianne Starren en Monique Jennissen mit zangk van Henk Dols. ‘t leidje ‘Nog Zitterder es dich‘ gesjreve door Theo Weijman en Mark Willems mit zangk van Lisa en Max Schiffler behaolde de viefde plaatsj en de zösde plaatsj ging nao ’t door Theo Wezenberg gesjreve leidje ‘Same Vastelaovend viere‘ dat wurt gezonge door mooder en zoon Marjolein en Remco Vermeule.
Naeve dees zös wennende leidjes komme op de nuuje Marotte CD en Kenjerleidje en ein Tienerleidje te sjtaon.
Foto: VastelaovendZitterd – RBZitterd
