Tradisjoneel wurt op Vastelaovesdaensdig saoves ‘t Maske begrave es teike dat de Vastelaovend veurbie is. Dit Carnavaleske aafsjied van de Vastelaovend wurt georganezeiert door Zitterd Same, Culturele vereiniging de Mander die ooit dit inisjatief haet genomme en Luuj mit Plezeier. Al in de jaore dertig van de veurige eeuw begrouf De Mander ’t Maske en höbbe zie dees tradiese in 1974 opnuuj opgepak. Noe make Same Zitterd en De Mander same ’t sjloetsjtök van de Zittesje Vastelaoves 6-daagse die kolderiek en hartversjeurend tegeliek is.
De sirremonie begint om 18.11oer es door Sjtadsprins Rob I n de anger aanwezige Prinse ’t Maske wurt aafgehaold dat op de 11de van de 11de door ex-prins León I is opgehange aan ’t balkon van Kafee De Kroon. Aansjloetend wurt uch door Tapperie De Gats taege ein klein prieske ein Vastelaovesdiner aangebao.
Om 22.00oere vertrek veur de Patesjkirk op de Mert de fakkeltoch nao ’t Kloosterplien. Om 22.11oere begint dao de plechtige sirremonie van ’t Maske Begrave. Nao ein carnavaleske en hartversjeurende toesjraok door de Sirremoniemeister, wurt de rood, gael, gruin vaan gesjtreeke en volg ‘t zjwaorste deil van de sirremonie: de menuut sjtilte. Tot sjlot zal de trompetis ‘Zitterd Allein’ veur de letste keer euver de sjtad laote klinke. Om ’t leid ein bietje te verzachte is nao aafloup bie Tapperie De Gats ein Kaffetaofel.
Foto: VastelaovendZitterd – RBZitterd
