Marotte Jaororde 2019 in ´t teike van Jubbelei

2019

Jaorliks leet Sjtadsvastelaovesvereiniging De Marotte Zitterd ein nuuj jaororde ontwerpe. Allein eine kleine krèngk binne De Marotte is op de heugte van ’t thema, jeederjaor dus weier ein verassjing. De jaororde van dit jaor is veur de viefde keer op riej ein ontwerp van Luc Bormans. De ongersjeijing krig me neit zomèr. Men mot dae get veur doon in ’t belang van De Marotte en de Zittesje Vastelaovend. De jaororde van De Marotte is en blif daorom ein kleinood om te drage en te beware!

Ontwerp:
Ontwerper Luc haet zich dit jaor laote inspireiere door mèr leifs drie jubbelei oet de Zittesje samelaeving. ’t Jubbelei van ’t Optoch Kommitee, de Sint Rosa Kapel en de herreze voetbalclub Fortuna Sittard. Hiemit waere cultuur, sjport en religie mit ein verbondje. De Marotte sjtaon immesj midde in en breid in de samelaeving. De Marottesjlaager van dit jaor en ’t daobiej heurende motto ‘1 2 3 Vastelaovend’, zörge dan ouch veur ein toepasselikke omliesting van dees jaororde.

De Marotte Jaororde 2019

De jaororde sjteit veur ein gedeilte in ’t teike van ‘t 5x11jaorig jubbelei van ’t Optoch Kommitee Zitterd. Dit wurt gevisualiseierd door de bekende mutjs mit onger anger ’t Zittesj krulkruuts, ’t kwesjke en de naam van ’t Optoch Kommitee. Onder de musjt van ’t Optoch Kommitee sjteit de in Zitterd bekende Sint Rosakapel, geboewd op ’t hoogste punt van Zitterd. De kapel is gewied aan Rosa van Lima, patronesse van Zitterd, die in 1669 woord aangeroupe om Zitterd te vrieware van de zjwarte pest. Pés op de daag van vandaag wurt zie mit de jaorlikste processie door oos sjtad geëerd. Rechs op de jaororde, gestileierd weergegaeve, sjteit aafgebeeld Vrouw Fortuna mit in häöre handj eine grote voetbal. Natuurlik verwis dit nao Fortuna Sittard. In ’t sezoen 2018-2019 viert de club ’t gouwe jubbelei. Veur Luc Bormans waar dit, naeve de promose nao de eredivisie, ein sjoon moment om de Zittesje club in zien ontwerp de verwirke.

Links sjteit wiejer ’t jaortal 2019 en de naam Marotte Zitterd. Linksbaove de Vastelaoveskleure rood, gael en gruin die aan de rechterkantj euvergaon in gael-gruin, de kleure van Fortuna. De ciefesj 1 2 3 mit de teks van de Marottesjlaager van dit sezoen make de jaororde kompleet.

De jaororde is es pin te koup in de Marottewinkel of via de webshop van De Marotte.

Bron: De Marotte Zitterd
Foto: Arjan Krijntjes / De Marotte Zitterd