Marotte Finale Sjpektakel mit zangk, dans en kolder

2019

´t Geit op de Vastelaovend aan en dan verplaatsj ´t fees zich van bènne nao boete. Mèr veurdat op zondig 24 Fibberwarie de Kènjeroptoch door de Zittesje sjtraote zal trekke, sjloete De Marotte de reeks zittinge aaf mit ’t Finale Sjpektakel. Dees letste zitting van ’t sezoen vèngk plaatsj op zaoterdig 23 Fibberwarie om 20.00oere in de Zittesje Sjouwburg De Domijnen.

’t Finale Sjpektakel belaof eine aovend vol verrassjinge te waere mit zangk, dans en kolder. Net es de aafgeloupe jaore vèngk dees zitting plaatsj aan lang taofele en sjtehtische op ’t podium van de grote zaal van de sjouwburg. De Marotte zeen weier d’r in gesjlaag om ein zeer gevarieiert en kwalitatief hoogsjtaond pregram op de buun te kènne brenge.

Buuttereedner Bjorn Smits brèngk zien kampioensbuut van 2018 ‘Baerkte de werme bekker’ en Peter Vaessen zal es ‘Knotervot’ op de buun versjiene. Muzikale biedrage zeen d’r van versjellende Limburgse top artiste wo onger Erwin en Sjtóm Toeval brèngk de Marotte sjlaager ‘1, 2, 3 Vastelaovend’. Tiejes dit sjpektakel maag ouch de favoriete ‘band mit ein hoog kapel gehalte’ van Sjtadsprins Rob I neit ontbrake: Trööt in de Gööt. Meer muzikaliteit van eige baom kump van de mechelkes van Veier-G mit ’t Marotte Tienerleidje ‘Doe Dao’ womit zie in de finale van Tiener Vastelaovesleidjes Konkour sjtonge. De kènjer van OBS de Sjtadssjool zulle ’t Marotte Kènjerleidje ‘Tisneitniks’ ten geheure brènge.

De oet Tudder aafgekomstige dansgrop Rot Weiss leet mit 19man sjterk versjèllende garde- en showdanse zeen. Dus laot uch verrassje door dit gevarieiert pregram!. De muzikaal omliesting is in de vertroewede henj van De Marottekapel. Nao aafloup zörg DJ Jeroen laven veur meziek bie de naozit.

Kaarte veur ’t Finale Sjpektakel zeen te koup in de Marottewinkel (Van Neer Eyckeler, Brandsjsjtraot 11, aope op zaoterdig van 10-17oere). De entreekaarte veur deze aovend koste €17,50.

Update 22 Fibberwari:
De Marotte höbbe bekend gemaak dat ‘t Finale Sjpektakel is OETVERKOCH!

Bron: De Marotte Zitterd
Foto: Ton Dirkx