Op de oetruipingszitting in de Zittesje sjouwburg is Marc Webers door De Marotte Zitterd benuimp pes Ridder in de Orde van de Pappegey. Dees ongersjeiding wurt jaorliks toegekent aan eine persoon dae väöl veur de Zittesje Cultuur beteikent en de Vastelaovend in ’t bezunjer. Marc is de 147e Ridder in de Orde van de Pappegey dae saer 1898 is benuimp.
Marc Webers opgegruijt in Munstergelaen, getrouwd mit Anne-Marie Wessels en vader van Chiel en Mil, is in ’t dagelikslaeve saer 1994 grafisch vormgaever (Studio MarQ). De kreativiteit en de Zittesje Vastelaovend zitte in in zien bloud, al väöl langer dan zien professioneel carriere is hae al kreatief bezig mit Vastelaovend.
Marc ontwerp jaorliks de hoessjtiel van De Marotte Zitterd, die is gebaseiert op de Marottesjlaager of ’t motto van ’t sezoen. Dees hoessjtiel kump op tal van plaatsje trök, zo es de CD-hoes, social media, affiches en dekors. Daonaeve is Marc lid van de redaksie van jaorblaad De Pappgey, wo hae verantwoordelik is veur de lay-out van dit kolderblaad. De bekendste krease van Marc is bie väöle de mascotte die hae haet ontworpe veur ’t jubbelei 11×11 jaor De Marotte Zitterd en dae bie ’t jubbelei 12×11 jaor ein eigetiedse vorm kreeg.
Veur ’t Optoch Kommitee ontworp Marc dit jaor de jubbelei mok 5×11 jaor Optoch Kommitee.
Marc is saer April 2013 veurzitter van de Waageboewesj Buurt Sjteivig. Al teentalle jaore is hae aktief es waageboewer, in ’t bezunjer es sjilder van de waage. Daonaeve ontwerp hae jaorliks ‘De Greutje Pin’ veur Klup Kump Gout.
De Vastelaovend geef hae gaer door aan de jongere generase. Zien eige zone sjtimuleiert hae om deil te numme aan de Opotchte en zoon Chiel waar al ens prins van basissjool Leyebrouk.
Boete de Vastaovend is Marc o.a. lid van Club Chicane en sjteunt hae belangeloos talloze initiatieve mit zien kreativiteit. Op de lange lies die hie euver is same te sjtelle sjtaon beveurbeeld de ‘pinkes’, sjilderie en penteikeninge veur ’t Sint Rosa Kommitee, de Zittesje Revuu en de opmaak van ’t Zittesj laesplenkske veur Veldeke Zitterd.
Bron: De Marotte Zitterd
Foto’s: MarotteTV
