LVK wènnesj bie de äöpening van ’t Vastelaovessezoen

2020

De Samewirkende Vastelaovesvereiniginge Groot-Zitterd äöpene op de 11de van de 11de gezamelik ’t nuuj Vastelaovessezoen. Dees äöpening véngk plaatsj op ’t Zittesje Kloosterplien vanaaf 18.30oere. De organezase is in hènj van De Marotte Zitterd.

Naeve ein aantal offesjeel momente is d’r väöl mezien van onger mee drie LVK-wennesj!!

De Geliënde oet Hulsberg zeen in 1995 opgericht es trio en saer 2007 ein duo dat besjteit oet Maurice Pluijmakers en Roger Vliegen. Al 17 keer wiste zie de finale van ’t LVK te bereike mit hun bekende leidjes es ‘Onger dat läögske sjmink’, ‘Hand in hand veur Vastelaovend’ en ‘Wo zit ’t bie dich’. Hun hoogtepunt waar toen zie in 2017, nao mennig top 3 plaatsj, mit ‘Code Rood, Gael, Gruin’ ’t LVK wiste te wènne.

De Tweede LVK winnaar op ’t pregram is De Toddezek oet Grubbevors. Dit trio besjteit oet de breurs René en Geert Verschueren en Twan Relouw. De Toddezek sjtonge al mènnigmaol in de finale van ’t LVK en wiste ’t LVK al drie keer te wènne. In 2007 wonne zie mit ‘Heej bliëf ik plekke’, in 2009 mit ‘Nie mier en nië minder’ en in 2014 wonne zie ’t LVK mit ‘Onhendig leedje’.

De dreide in riej van LVK wènnesj zeen de regeierende wènnesj van ’t LVK Hoondervel! Zie wonne aafgeloupe jaor ’t LVK mit ‘Groete oet de Fieësttent’. Hoondervel is eine grop van vrunj die al jaorelangk same meziek make en mènnig zaal en plein oppe kop höbbe gezat. Meerdere kere wiste zie de finale van ’t LVK te behaole en scoorde dao hoog mit hunne enerzjie op de buun en de interactie mit ’t pebliek. Naeve de finale van ’t LVK sjtonge zie al op grote podia es de Zoepkoel in Venlo en bie de 11de van de 11de in Mesjtreich. Bie de äöpening van ’t Vastelaovessezoen zulle zie uch de Groete oet de Fieësttent brènge, met dan in de äöpeloch van ’t Kloosterplien.

Veur de äöpening van ’t Vastelaovessezoen is jeederein mit ein hart veur de Zittesje Vastelaovend oetgeneudig. De entree is Gratis! Einigzins verkleid komme zörg veur eine richtige Vastelaovessfeer, mer is natuurlik neit verplich.

Bron: De Marotte Zitterd
Foto: Stichting LVK, fotograaf Fred Janssen