Marotte Kènjerzitting vol sjpas, dans en meziek

2019

Op Gounsdig 20 Fibberwari vèngk in de grote zaal van Poppodium Volt de kènjerzitting van Sjtadsvastelaovesvereiniging De Marotte Zitterd plaatsj. Door onger angere de kènjerzitting wille De Marotte d’n eeuwen-awwe Zittesje Vastelaovestradieses euverbrènge op de volgende generase. De middig in Volt begint om 14.33oere, de zaal is vanaaf 13.33oere geäöpend veur ’t jeugdige pebliek.

De Marotte roupe de kènjer en hun auwwesj op om verkleid nao de zitting te komme. Veur de sjoonst verkleide kènjer en pap en mam haet Sjtadsprins Rob I ein leuke verrassjing. Sjtadsprins Rob I krig tiejes deze middig ongersjteuning van ein jeugraod van elf gevormp door leerlinge van De Sjtadssjool. Zie lere de aanwezige ouch de sjoonste danspeskes op ’t door ex-Sjtadsprins Wouter I geremixt en door Paul-Jean Jessen gezonge nömmer ‘’t Eesjte Muulke’. In 2011 woort van dit nòmmer, dat in 1979 de Vastelaovessjlaager van Zitterd waar, al èns ein videoclip gemaak. Naeve dans en bewaeging sjtaon versjèllende muzikaal optraës op ’t pregram van drie finaliste van ’t Kinjer Vastelaovend Leedjesfestival en kump Sjtóm Toeval de Marottesjlager 2019 ‘1, 2, 3 Vastelaovend’ zènge. De Zittesje kènjerkapel zörg veur de muzikaal omliesting van ’t pregram.

Boete baovesjtaonde artiste kump ouch de leukste clown van ’t Zuide nao Poppodium Volt: Clown Pipo Pé. Naeve goochelen, ballonfigure make en danse haet hae ouch eige leidjes gemaak. Die geit hae same mit ’t jeugdige pebliek zènge. Aeve tot rös komme kent bie Luna events. Dao kènne de kènjer ein hippe glittertattoo op hunne erm laote zette of geneite van ein lekkere sökkersjpin. Tot sjlot zènge kènjer van ‘Het Mozaïek’ en basissjool De Lemborgh same mit hun idool: Fabrizio.

Kaarte veur dees väölzijdige kènjerzitting zeen op de daag van de zitting nog te koup aan de kassa bie Volt. Zeet waal oppe tied wènt vol=vol!


Bron: De Marotte Zitterd
Foto: Arjan Krijntjes