Kènjervastelaovesposter Zitterd-Gelaen

2019

Veur ’t driede jaor op riej versjient de Kènjervastelaovesposter Zitterd-Gelaen. De Kènjervastelaovesposter is ein initiatief van Buro 046, de Domijnen en kunstenaeres Marij Heijligers. De Kènjervastelaovesposter wurt gemaak aan de handj van ein teikening van kènjer van basissjole. Naeve dat de kènjer bie ’t make van ein teikening kraetief bezig zeen kriege zie ouch en sjtökske mit van de cultuur van de Vastelaovend.

Aan de Kènjervastelaovesposter höbbe dit jaor ca. 650 kenjer oet grop 7 en 8 van 22 basissjole oet de gemeinte Zitterd-Gelaen mitgedaon. Op alle deilnummende sjole haet Marij Heijligers gastlesse verzörg en de kenjer veurzeen van de neudige tips en hulp bie ’t make van ein teikening. Alle leerlinge die höbbe mitgedaon make kans om oetgekaoze pès de Kènjervastelaovesposter 2019.

Ein eesjte seleksie is gemaak door de kènjer zelf, wènt alle deilnummende groppe van de sjole höbbe zelf drie teikening gekaoze welke nao de zjurie zeen gesjtuurd. De zjurie haw op gounsdig 6 Fibberwarie de zjwaor taak om oet alle inzendinge de sjoonste,leukste, meis carnavaleske teikening te keize.
Van de wènnende teikening wurt de Kènjervastelaovesposter 2019 gemaak. De poster wurt op vriedig 15 Fibberwarie op de sjool van de maker onthuld.

Vanaaf 20 Fibberwari is de poster gratis aaf te haole op versjèllende plaatsje in de gemeinte Zitterd-Gelaen. Alle teikeninge zeen pès Vastelaovend te bewonjere in de hal van de Hogeschool Zuyd in de Ligne in Zitterd.

Foto’s: VastelaovendZitterd-RBZitterd