Jan Janssen benuimp pès Vors Marot

2020 Vors Marot

De Wieze Raod van Sjtadsvastelaovesvereiniging De Marotte Zitterd haet op de vergadering van 20 November de heer Jan Janssen benuimp pès Vors Marot. De insjtelase van Jan Janssen pès Vors Marot Jan I zal plaatsjvènje tiejes de Oetruipingsaovend op 4 Jannewari e.k. in ’t Forum Theater.

Jan Janssen, in ’t dageliks laeve wirkzaam bie de Plisse, is getrouwd mit Agnes en vader van twee zoons, Jan Willem en Casper. De pap van Jan waar medeoprichter en jaorlangk Vors van de Vastelaovesvereiniging in Pöt. De auwwesj van Agnes zeen richtige Vastelaovesvierders. Zoon Casper waar in 2014 Sjtadsprins van de Flaarisse oet Gelaen! en Jan-Willem waar toen ziene adjudant. Kortom Vastelaovend al generases langk mit de paplepel ingegaeve!

Jan is woonachtig in de Waereldsjtad Gelaen, op ein plek mit oetzich op ’t Marotteriek. Mit Jan höbbe De Marotte eine väölziedige Vors Marot bènne gehaold. Hae waar jaorelangk fanatiek zaal- en veldjvoetballer en sjpeelde tennis. Hae waar lid van de toneelvereiniging Pöt, sjpeelde dao mit in mènnig revuu en zong in jongerekoor Popularum.

Ein grote passie van Jan is zènge. Hae sjtong mit de grop Veer-Veere op alle grote podia in Limburg, wo onger ’t Kanon van ’t Balkon en sjtong mèr leifs veier keer in de finale van ’t LVK. In 2007 scoorde de grop mit de mitzènger ‘Ko zak door’ ein verdeinstelikke tweede plaatsj. Mit de ‘foute’ feesband Sorry voor de Krekels sjteit hae al teen jaor op ’t podium bie onger anger ’t smartlappenfestival in Zitterd. Daonaeve is hae ouch es prizzentater aktief. Beveurbeeld van de Lederhosenland modeshow, beierkiene bie Ich & Dich, resepsies van ’t Alternatief Sjöttefees en Simme Saame, de middig veur verstandelijk gehandicapten tiejes ’t Oktoberfees. Wae nao de Zittesje revuu geit, zuut häöm sjittere es de finansjeel directeur van de Sjouwburg, dae kanaries hilt is hobby.

“’t Laeve is om risico’s te numme EN om herinneringe te make!’”

Woorom Vors Marot?
Op de vraog “Woorom Vors Marot?” haet Jan ein duujelik antjwoord: ‘Geluif ’t of neit, dit sjtong al jaore op nömmer 1 van mien bucket list. En ich besef dat ’t insjtapmoment messjien neit ’t meis gunstige moment is, mèr ich bèn noe waal gevraog. Vastelaovend is ein fees van ’t volk en ’t meis verbroederende fees. Euveral sjpeelt toch waal ens get. Ich sjpraek de haop oet dat veer mit zien alle mótte prebeiere ’t verleje te vergaete en de toekóms waerd vénje om veur te laeve! Veer motte ’t sjpel van Vastelaovend weier same kènne sjpele! Mit respek veur ein. Alles veur ’t behoud van d’n Eeuwen-awwe Zittesje Vastelaovend. Sjpraek mich gerös aan, ich loester nao jeederein! Dat alles passend bie mien liefsjpreuk: “’t Laeve is om risico’s te numme EN om herinneringe te make!’”

Bron: De Marotte Zitterd
Foto: De Marotte Zitterd