Insjtelase Rob Goosens pès 88e Sjtadsprins van Zitterd

2019 Prins

Zaoterdig 19 Jannewarie e.k. is om 20.00 oer in de grootezaal van de Sjtadssjouwburg ‘De Domijnen’ de insjtelasezitting van Sjtadsprins Rob I. De zaal is vanaaf 19.33 oer geäöpent. De muzikaal omliesting is in henj van de Marottekapel. Nao aafloup van de zitting is ´t Prinsebal mit DJ Sepp.

De insjtelasezitting van De Marotte is ein zitting die in ‘t teike sjteit van komme en gaon, mer dan in omgedreede volgorde. ‘t Gedeilte veur de pauze sjteit in ’t teike van ’t aafsjeid van regeierend Sjtadsprins León I. Es eesjte véngk ‘t ‘plökke’ plaatsj. Volges protocol levert Sjtadsprins León I achtereinvolges de scepter, de vaere, de prinsemutsj, de ketting mit de nonnevot en ’t verke, ’t sjlaateveugelke en ‘t pappegeyke in. Nao ‘t plökke volg ´t dankwoord van de ex Sjtadsprins León Kaminski. León en zien femieje kènne trök kieke op ein regeierperiode vol hoogtepunte. Aansjloetend brenge de Auwt Prinse hun tradisjonele Grosse nómmer. Wie zie op de regeierperiode van León trök kieke zal blieke in de Grosse Nómmer, die tradisjoneel bol sjteit van de neudige kolder en hilariteit.

Proklemase
Nao de pauze sjteit Rob Goossens centraal. De aankommende Sjtadsprins wurt op de buun gebrach door femieje, vrunj, buurt en vereiniginge. Gezamelik prizzenteiere zie ein ekt die bol sjteit van illemente die verwieze nao de nuuje Sjtadsprins en aktualiteit. Rob, wirkzaam es marketing specialist bie de regionale omroep L1, hiltj van de eeuwen-awwe Zittesje Vastelaovend mit zien prechtige leidjes en The Rolling Stones. Hae is lid van de sjpaarklup en de zaalvoetbalvereiniging van kafee Schtad Zitterd en CV ’n Bietje wiejer. Hae is aktief bènne de PR-kemisse van de Marotte, groot fan van Trööt in de Gööt en medeorganizater van de Mansluujstehung in Schad Zitterd. Kortom ingrediënte genog om d’r ein sjitterende ekt van de make.

Aansjloetend aan ’t opbrènge volg de offesjeel insjelase van Rob Goossens pes de 88e Sjtadsprins van De Marotte, mit de ‘aed aan ’t vaenke’, ’t oetreike van de bie ’t prinssjap beheurende teikes, ’t veurlaeze van de proklemase en de bekendmaking van zien Prinsemotto. Aan ’t enj van de zitting trakteiert Sjtadsprins Rob I mit de tradisjonele nonnevotteraege alle aanwezige op ein richtig Zittesje nonnevot.

Losse Kaarte veur de insjtallasezitting zeen te koup in de Marottewinkel op de Brandsjtraot bie Van Neer-Eijkeler (donderdig 10-14oer en zaoterdig 10-17oer) en bie de Oetbalie van de Sjouwburg.

Bron: De Marotte Zitterd
Foto: Arjan Krijntjes