De Auw Prinse organezeiere de eesjte Grosse Nómmer Zitting

2020
Ein fragment oet de Grosse Nómmer 2019 (beeld: Marotte TV)

Op Zaoterdig 25 Jannewarie organezeiere de Zittesje Auw Prinse de eesjte Grosse Nómmer Zitting in ’t Forum. Onger ’t motto ‘Ouch ich waar èns Prins Carnaval’ sjteit deze aovend in ’t teike van ’t opnumme van Rob Goossens es nuut lid van de Auw Prinse.

Väöle jaore höbbe de Auw Prinse hunne tradisjonele Grosse Nómmer gebrach op de insjtelasezitting, nao ’t plökke van de aaftraejende Sjtadsprins. Mit de kolderieke Grosse Nómmer wurt de ex-Prins dan opgenomme es lid bie de Auw Prinse.

Dit jaor höbbe de Auw Prinse besjlaote om de Grósse Nómmer te brènge op ein eige zitting: De Grosse Nómmer Zitting. In de Grosse Nómmer zulle de Auw Prinse naeve Sjtadsprins Rob Goossens, dae ein waek eerder is geplök, ouch anger bekende Zitterder, aktualiteit en de politiek aan bod laote kómme. Daonaeve zulle versjèllende artiste zörge veur ein gevarieierd Vastelaovespregram.

De Zitting begint om 20.11oere, de zaal van ’t Forum is aope vanaaf 19.11oere. Nao aafloup is eine naozit mit laif meziek.

De Kaartverkoup veur kaarte veur de Grosse Nómmer zitting sjtart op 1 december om 11.11oere via de websait van ‘t Forum.

Update 2 December:
De Auw Prinse höbbe bekend gemaak dat de Grosse Nómmer Zitting is OETVERKOCH.

Bron: Facebook Auw Prinse Zitterd
Foto: Auw Prinse Zitterd