Groote Optoch: Al Drie thema’s ‘vol’

2019 Optoch

Ruum drie waeke veurdat de Groote Optoch zal trekke haet ’t Optoch Kommitee bekend gemaak dat drie thema’s al aan ’t maximaal aantal zitte en daodoor neit mee kènne waere goudgekeurd/ingesjreve. Dees drie thema’s zeen: De perikele rondjom De Marotte, de Vors Marot en de finansjeel toesjtand van de gemeinte Zitterd-Gelaen.

Twee jaor geleje zörgde ’t thema ‘de Sjpaspas’ (betaalmiddel op de Mert mit Vastelaovend) veur aafwiezinge in de letste daag veur de Optoch. Veur ’t Optoch Kommitee waar dat ein aanleijing om noe te melje es ein thema ‘vol’ zit. Dit om te veurkomme dat luuj nog ein idee rondj dees thema’s gaon oetwirke.

Aevel omdat ’t Optoch Kommitee ’t ouch van belang vèngk om zoväöl muigelik luuj aan de Optoch te late deilnumme, kènt jeedein dae ein idee haet oetgewirk (en nog neit haet ingesjreve) mit betrekking op dees thema’s kontak opnumme mit de Optochsamesjtèllesj Jean Wijnands en Maurice Indemans via aanmelden@optoch.nl. Zie gaon dan kieke of de wies van oetbeelde nog neit veurkump en kènne de insjrieving van ’t thema dan muigelik toch nog goudkeure.

’t Is oetzunjerlik dat al ruum drie wake veur de Groote Optoch al thema’s ‘vol’ zitte. Volges Peet van Erp, veurzitter van ’t Optoch Kommitee, is dit nog neit eerder veurgekomme en is dit jaor sjraoke van ein duudelikke trendbreuk. Anger jaore melde 60% van de deilnummesj zich pas aan in de letste twee waeke veur de Optoch. In vergelieking mit aafgeloupe jaor höbbe zich noe al ruum de hèlf van de deilnummesj aangemeldj.

Aanmelje veur deilname aan de Groote Optoch kènt nog pés Gounsdig 27 Fibberwari via www.optoch.nl/aanmelden.
Veur de Kènjeroptoch is gein beperking veur thema’s, waal haet ’t Optoch Kommitee, in verbandj mit de organezase, ’t verzuik aan de deilnummesj om ouch veur de Kènjeroptoch in te sjrieve.

Bron: Optoch Kommitee Zitterd
Foto: VastelaovendZitterd – RBZitterd