Finale Limburgs Vastelaovesleedjes Konkour 2019

2019 Meziek


Vriedig 15 Fibberwari is in ’t Mecc in Mesjtreich de finale van ’t Limburgs Vastelaovesleidjes Konkour (LVK). Bie de 20 finaliste zeen twee Zittesje leidjes.

De eesjte Zittesje finalis is ’t duo Jesse & Jesse mit ’t leidje ‘laot os mer sjuve’. De teks is gesjreve door Thei Wessels en de meziek door Quinn Warmerdam. Jesse & Jesse besjteit oet Paul-Jean Jessen en ziene naef Tristan Jessen. In de finale zulle zie optraë es nömmer 13.

De tweede Zittesje finalis is ’t jeugdige duo Sjtóm Toeval mit de Zittesje sjlaager ‘1 2 3 Vastelaovend’. De teks en meziek zeen gesjreve door Thei Wessels. Sjtóm Toeval dat besjteit oet Thierry Dirkx en Maxime Tummers, maak ‘t debuut in de finale van ’t LVK, wo zie es nömmer 18 zulle optraë.

In de finale wurt gezjureiert door vief zjuries. Naeve de hoofd(vak)zjurie zeen dat de zjuries Vastelaoves-waereld, kasteleins en Auwt finaliste. De letste zjurie is ’t volk van Limburg, wo jeederein kènt sjtömme via SMS. Bie dees letste zjurie höbbe Jesse & Jesse en Sjtóm Toeval eur sjteun neudig, wènt wie mee SMS-sjtömme wie mee punte!

Sjtömme:
‘t Sjtömme veur ’t LVK is dit jaor get verangert. Sjtömme kènt allein via SMS en dao kènt nog mer op ein leidje waere gesjtömp.

Om te sjtömme op Jesse & Jesse SMS: LVK [sjpasie] 13 nao 4422
Om te sjtömme op Sjtóm Toeval SMS: LVK [sjpasie] 18 nao 4422

’t Moment en de doer dat gesjtömp kènt waere zal in de oetzending bekend waere gemaak. Let op: Per tillefoonnömmer kent mèr eine keer waere gesjtömp.

Mee infermase euver ’t LVK en alle 20 finaliste is te vènje op de websait van de Stichting LVK.

Foto: Stichting LVK