De Vastelaovend is nog mèr pas achter de rögk en toch organezeiert ’t Optoch Kommitee Zitterd op zaoterdig 23 Meert e.k. vanaaf 19.33oere de jaorlikse film- en naokaart aovend. Deze aovend wurt gehawte in de Optochhal aan ’t Fischerpad 111 en is veur jeederein gratis toegankelik.
De aafsjloetaovend van ‘t ‘viefde sezoen’ is ein gelaeg om onger ’t genot van ein hepke en drènkske nao te kaarte euver ‘t aafgeloupe Vastelaovessezoen en om ervaringe en ideeën oet te wissele. De ganse aovend zeen doorloupend de films van de Kènjeroptoch, de Groote Vastelaovesoptoch en historische beelde van optochte te bekieke. Es klap op de vuurpiel zeen op versjèllende LCD-sjerme de sjoonste foto’s van ’t sezoen te bekieke.
Sjtadsprins Rob I krig deze aovend, oet henj van Optoch Kommitee veurzitter Peet van Erp, ’t eesjte exemplaar van de DVD mit dao op de beelde van de Kènjeroptoch, Groote Optoch en de Sjörkarre optoch aangebao. Wiejer is deze aovend nog aandach veur ‘t 5×11 jaorig besjtaon van ’t Optoch Kommitee Zitterd.
Sfeervolle Optochhal
De aovend vèngk plaatsj in de Optochhal, midde tössje de groote Vastelaoveswaages, die zelf deil oetmake van de optochfilm. De optochhal zal sfeervol waere verleich en d’r wurt ein gezèllig pleintje gemaak wo genog zit- en sjtaonplaatsj is om onger ’t genot van ein hepke en drènkske te klasjeneiere en de beelder van de optochte te bekieke. Kortom, veur jeederein eine gezèllige aovend in de Optochhal.
Bron: Optoch Kommitee Zitterd
Foto: VastelaovendZitterd – RBZitterd
