Eesjte Kènjerzjurie bie de Kènjeroptoch

De Kènjeroptoch dae tradisjoneel ein waek veur de Vastelaovend door Zitterd trèk, krig dit jaor eine primeur in de vorm van ein Kènjerzjurie. Acht kènjer is de laeftied tösje 10 en 12 jaor gaon bie de kènjeroptoch op versjèllende aspecte beoordeile.

De Zittesje kènjeroptoch is veural veur en door de kènjer. Nao ’t Kèrkesprojek, ein eerder initiatief van ’t Optochkommitee, sjtart de optochzjurie dit jaor mit ein kènjerzjurie. Astrid Verblakt, veurzitter van de Optochzjurie lègk de achtergrondje oet: “Es nuuje veurzitter van de optochzjurie bèn ich de oetdaging aangegaon om dit jaor de kènjerzjurie te intruduceiere. De optochzjurie haet vernuujing hoog in de vaan sjtaon”. Zie haop dat mit de introduksie van dees kènjerzjurie ein nuuj tradiese is gebaore.

Bie de kènjeroptoch op zondig 24 Fibberwarie geit de kènjerzjurie, naeve de optochzjurie, veur ’t eesj aan de sjlaag. De kènjerzjurie besjteit oet acht kènjer tössje 10 en 12 jaor awt. Veur de kènjerzjurie zeen Zittesje basissjole gevraog om leerlinge aaf te vaardige, wo door de sjoole positief op is gereageiert. De samesjtèlling van de kènjerzjurie zal jaorliks gaon rouleiere. Fieny Cals (Ridder in de Orde van Pappegey en directeur van SBO het Mozaïek) haet de begeleijing van de kènjer op zich genomme.

Tiejes de optoch beoordeilt de kènjerzjurie, same mit de optochzjurie, de deilnummende kèrkes. Daonaeve beoordeile zie de sjpisjaal prieze ‘Sjoonst verkleid Mechelke’ en ‘Sjoonst verkleide Sjnaak’. Taeves reike ze aan de wènnesj van dees sjpisjaal prieze ein eige kènjerzjurie vaenke oet. De lede van de kènjerzjurie krieg eine sjpisjale sjteek en ein prezentje es dank veur ’t zjureiere.

Foto: VastelaovendZitterd – RBZitterd